له نوي افغان ولسمشر سره د اړیکو د ښه کېدا هڅه کوو

د

پاکستاند صدر اعظم نواز شریف د ملي امنیت سلاکار وايي، تمه لري، چې د افغانستان او پاکستان تر منځ ترینګلې اړیکې د نوي ټاکل شوي ولسمشر ډاکتر محمد اشرف غني احمدزي په دوره کې ښې شي.
د جمهور آژآنس د خبر له مخې د پاکستان د ملي امنیت سلاکار دغه څرګندونې وروسته له هغه کوي، چې د افغانستان نوي ټاکل شوي ولسمشر ډاکتر غني احمدزي تېره ورځ د وفادارۍ لوړه وکړه.
ښاغلي غني د لوړې په مراسمو کې د ګاونډیو، سیمې او نړۍ له هېوادونو سره د ښو اړیکو د ټینګولو ژمنه وکړه، او ویې ویل چې اختلافات باید د سیاسي لارو حل شي.
ښاغلي غني په خپله وینا کې د ګاونډیو او سمې د هېوادونو په اړه وویل«ټولو هېوادونو ته ډاډ ورکوم، چې د افغانستان خاوره به یې په ضد ونه کارول شي، له دوی هم غواړم چې خاوره یې باید د افغانستان پر ضد ونه کارول شي.»
د ښاغلي تر لوړې او دغه څرګندونو وروسته د پاکستان د لومړي وزیر نواز شریف د ملي امنیت سلاکار ویلي، پاکستان د افغانستان له نوي ټاکل شوي ولسمشر سره د اړیکو د ښه کېدو هڅه کوي.
ښاغلي عزیز ویلي، چې د افغانستان او پاکستان ترمنځ اړیکې په ځانګړي ډول د ولسمشر کرزي د حکومت په وروستیو میاشتو کې زیاتې خړپړې شوې دي.
د پاکستان د ملي امنیت سلاکار سرتاج عزیز د امریکا وال ستریټ ژورنال ورځپاڼې ته ویلي«موږ له پخواني ولسمشر حامد کرزي سره ښې او ګټورې خبرې کړې وې. د دواړو خواوو اړیکې ښې شوې وې، په تېره بیا د ترانزیت، سوداګرۍ، د لویو لارو د جوړولو، د برېښناکوټونو، او د اورګاډي د پټلیو د جوړولو په برخو کې. خو د کال په پیل کې هر څه ساړه شول. که رښتیا وایم موږ نه پوهېږو چې ولي داسې وشول.»
که څه هم نوموړي ویلي، چې نه پوهېږي، چې ولې د افغانستان او پاکستان اړیکې دومره خرابې شوې، خو وال ستریټ ژورنال ورځپاڼې ته یې ویلي:« آی ایس آی له طالبانو سره اړیکې نه لري.»
خو پخواني ولسمشر حامد کرزي په خپله وروستۍ وینا کې ویلي دي چې د پاکستان ملکي حکومت د افغانستان په وړاندې بده اراده نه لري، خو پوځ او استخبارات غواړي چې افغانستان یې ترلاس لاندې وي.
ولې سرتاج عزیز وال ستریټ ژورنال ته ویلي:«واک ته د افغان طالبانو رسېدا زموږ په ګټه نه ده. آی ایس آی له ۱۹۸۰ لسیزې را په دې خوا له طالبانو سره اړیکې نه دي لرلي. پاکستان هیڅکله نه دي غوښتي چې د افغانستان په کورنیو چارو کې لاسوهنه وکړي او یا د طالبانو په شمول د کومې ډلې ملاتړ وکړي.»
سرتاج عزیر پر داسې مهال له طالبانو څخه د پاکستان د استخباراتي ادارې د ملاتړ څخه انکار کوي، چې د افغان چارواکو سربېره د کاناډ د کډوالو چارو کریس الیکساندر هم ویلي چې د پاکستان استخباراتي اداره او پوځ په مستقم ډول د طالبانو تر شاه ولاړ دي.
نوموړی ویلي له دې هېڅ انکار نه شي کېدای چې پاکستان د طالبانو ملاتړ کوي، او د طالبانو ځالې په بلوچستان، کوټ، شمالي وزیرستان، او خیبر پښتونخوا کې دي.
جمهور آژآنس: کابل