هند او چین له افغانستان سره خپلو مرستو ته دوام ورکوي

هندي او چنايي چارواکي وايي، هېوادونه یې ژمن دي، چې له افغانستان سره خپلو وړیا مرستو او همکاریو ته دوام ورکوي.
د جمهور آژانس د خبر له مخې دغه څرګندونې د هند د ولسمشر مرستیال محمد حمید انصاري او د چین د چین د بشري منابعو او د ټولنیز امنیت وزیر ین ویمنګ له

ولسمشر ډاکتر محمد اشرف غني سره د کتنې پر مهال وکړې.
دواړو چارواکو د خپلو هېوادونو په استازیتوب ولسمشر او افغان ولس ته مبارکي وویل او د ملي یووالي د حکومت د جوړېدو او لوړې په مراسمو یې خوښي وښوده.
په دغه کتنه کې چې پرون په ارګ کې تر سره شوه، دواړو لورو د افغانستان او هند تر منځ د دوستانه اړیکو او همکاریو د دوام او د افغانستان له نوي حکومت سره د دغو اړیکو د لا پراختیا په باب خبرې وکړې. د هند د جمهوري ریاست مرستیال ښاغلي انصاري ډاډ څرګند کړ چې هند له افغانستان سره د خپلو مرستو او همکاریو دوام ته چمتو دی او له افغانستان سره د دغو همکاریو دوام ته نه یوازې د هند حکومت، بلکې د هند خلک هم ژمن دي.
جمهورریس احمدزي په تېرو کلونو کې له افغانستان سره د هند له مرستو او همکاریو څخه مننه وکړه او د هغو پر دوام باندې یې ټینګار وکړ.
ولسمشرغني و ویل چې افغانستان له هند سره ژورې تاریخي او دوستانه اړیکې لري، هر شخص چې د افغانستان د دولت واګي په لاس کې اخلي هغه به له هند سره دوستانه اړیکو ته دوام ورکوي.
ښاغلي د هند د ولسمشر له مرستیال څخه وغوښتل چې له افغانستان سره په بېلابېلو برخو، په ځانګړې توګه د بشري پانګې په برخه کې همکاري وکړي.
ده همدا راز وویل چې هند دې په هغو برخو کې افغان ځوانانو ته د لوړو زده کړو زمینه برابره کړي چې افغانستان ورته ډیره اړتیا لري.
د هېواد جمهورریس د افغانستان او هند ترمنځ د اقتصادي او سوداګریزو همکاریو پر پراختیا باندې د ټینګار په ترڅ کې وویل چې هندوستان دې د دې له موږ سره همکاري وکړي چې د افغانستان زراعتي محصولات د هغه هېواد بازارونو ته لاره پیدا کړي.
ډاکتر محمد اشرف غني احمدزي د سوداګریزو همکاریو د پراختیا لپاره ځمکنۍ ترانزیتي لارې مهمې او ګټورې وبللې، د ایران د چاه بهار بندر له لارې د افغانستان، ایران او هند ترمنځ د ترانزیتي لارې د جوړیدو د کار پر چټکتیا باندې یې ټینګار وکړ.
بل خوا د چین د چین د بشري منابعو او د ټولنیز امنیت له وزیر ین ویمنګ ښاغلي غني وویل چې چین له افغانستان سره د دوستۍ او همکارۍ دوام ته ارزښت ورکوي او د افغانستان استقلال، امنیت او ځمکنۍ بشپړتیا ته درناوي کوي.
نوموړي ډاډ څرګند کړ چې هېواد به یې له افغانستان سره په بېلابېلو برخو کې خپلو وړیا مرستو او همکاریو ته دوام ورکړي او په افغانستان کې به د پانګې اچونې کچه پراخه کړي.
ښاغلي یم ویمنګ، تروریزم د دواړو هېواد پر وړاندې ګډ ګواښ وباله او د دغې پدیدې پر وړاندې یې پر ګډې مبارزې باندې ټینګار وکړ.
په دې کتنه کې د چین د بشري منابعو او د ټولنیز امنیت وزیر د افغانستان جمهوررئیس ډاکتر محمد اشرف غني احمدزي ته بلنه ورکړه چې د استانبول د بهیر په څلورم کنفرانس کې چې د روان میلادي کال د اکتوبر د میاشتې په وروستیوکې د دغه هېواد د تیانجین په ښارکې جوړیږي، ګډون وکړي.
ښاغلي غني هم د ده د لوړې په مراسمو کې د چین د بشري منابعو او د ټولنیز امنیت د وزیر د ګډون او په تیرو کلونو کې له افغانستان سره د چین د مرستو له امله مننه وکړه او ویې ویل، چې د افغانستان حکومت د دې غوښتونکی دی چې د چین او افغانستان ترمنځ اړیکې لا پراخې شي.
ډاکتر محمد اشرف غني احمدزي، تروریزم د سیمې په کچه یو مشترک ګواښ وباله او ټینګار یې وکړ چې افغانستان ته د سولې راوستل یې د حکومت لومړیتوب دی.
نوموړي هیله څرګنده کړه چې د چین بازارونو ته د افغانستان د زراعتي محصولاتو د لارې موندنې په برخه کې د هغه هېواد چارواکې لازمه همکاري وکړي.
ښاغلي غني د وریښمو د لارې د بیا فعالیدو په اړه د چین د نظر ملاتړ وکړ، وې ویل چې د دغې لارې بیا فعالېدل فرهنګي او اقتصادي ګټې له ځان سره لري چې افغانستان یې د بیا فعالېدو غوښتونکی دی.
جمهور آژآنس: کابل