افغانستان په کرکټ کې هانګ کانګ ته هم ماته ورکړه

د المپیک د اسیایي کرکټ سیالیو په لړ کې افغانستان په نیمه پایلوبه

کې هانګ کانګ ته په ماتې ورکولو سره د دغه سیالیو پای لوبې ته لار ومونده.
د جمهور آژآنس د خبر له مخې د المپیک اسیایي سیالي په جنوبي کوریا کې په لار اچول شوې چې افغانستان هم په کې برخه لري.
د دغه سیالیو په لړ کې د نن د افغانستان او هانګ کانګ تر منځ د کرکټ سیالي تر سره شوه، چې افغانستان وکولای شول په ۸ ویکټو دغه سیالي وګټي.
د نن ورځې د لوبې بچه یا ټاس د افغانستان د کرکټ ټیم لوبډل مشر محمد نبي عیسی خیل وګټلو او خپله یې د توپ اچونې پرېکړه وکړه.
د هانګ لوبغاړي د لوبې له پیل نه ښه نه، او په ټاکل شویو ۲۰ اورونو کې یې د ۸ لوبغاړو په سوځېدو سره ۸۸ منډې وکړې او افغانستان ته یې د ۸۹ منډو هدف وټاکه.
د افغانستان له لوري لوبډل مشر نبي، د سیالې لوبډلې ۲ لوبغاړي، نسیم بړېڅ دوه لوبغاړي، کریم صادق دوه لوبغاړي، حمزه هوتک او فرید احمد ملک یو یو لوبغاړی وسوځاوه.
د باران له امله د لوبې اورونه او هدف راکم ۷۰ ته راکم کړای شو او افغانستان په توپ وهنه پیل وکړ.
د افغانستان د سر دوه لوبغاړي کریم صادق او نجیب ترکی زر زر وسوځېدل، خو شهزاد محمدي تر اخره ولاړ وو، چې په ۲۸ توپونو یې ۴۱ ناسوځېدلې منډې وکړې او افغانستان د ۷۳ منډو په پوره کولو سره دغه لوبه وګټله.
افغانستان تر دې وړاندې نیپال ته هم ماته ورکړې وه، او دایې د نیمه پای لوبې سیالي وه، چې هانګ کانګ ته په ماتې ورکولو سره یې ځان پای لوبې ته ورساوه.
جمهور آژآنس: کابل