افغانستان، پاکستان ته هېڅ ډول ضرر نه دی رسولی

د

پښتونخوا ملي عوامي ګوند مشر محمودخان اڅکزی وايي، افغانستان و پاکستان ته هېڅ ډول زیان نه دی رسولی او که چیرې پاکستان، افغانستان د یو خپلواکه هېواد په توګه ومني نو په سیمه کې امنیت پر ځای کېدای شي.
د جمهور آژآنس د خبر له مخې ښاغلي خان دغه څرګندونې تېره ورځ د سوات په مېنګوره ښار کې د پښتونخوا ملي عوامي ګوند یوې سیاسي غونډې ته کړې.
ښاغلي اڅکزي په دغه غونډه کې ویلي، چې پښتون په تاریخ کې یو پیاوړی او زورور ولس پاته شوي خو ځینې خلک یې د نوم بدولو هڅې کوي.
نوموړي ویلي«پر پښتنو چې د انګرېزانو په ګډون هر چا لیکنې کړې دي یوه هم دا نه دي لیکلي چې پښتانه په تاریخ کې کله هم فرقه پرست یا ترهه ګر نه دي پاتې شوي.»
د پښتونخوا ملي عوامي ګوند مشر محمود خان اڅکزي و ویل، چې په پاکستان کې یو لوی اکثریت پښتانه دي، او د دوی پر شتمنو او وسایلو به لومړی حق د دوی وي.
هغه په خپلو خبرو کې زیاته کړې«د پښتونخوا وطن ۱۵۰۰۰۰ زره مربع میله ځمکه نه چا موږ ته په خیرات کې راکړې، نه چا په زکات کې راکړې ده، دا خاوره د پښتنو د نامالومو او مالومو لکونو پښتنو په سرښیندنه ساتل شوې او دا پر موږ پور ده چې د خپل وطن واک او اختیار په جوړه جاړه په تنظیم وکړو او که موږ لږ منظم شو، دا کار موږ کولای شو. خېبر پښتونخوا، منځنۍ پښتونخوا فاټا» جنوبي پښتونخوا« د بلوچستان شمال» اټک او میاوالي، د دې وطن نعمتونه بې حسابه دي د دنیا په هر قانون، د قرآن کریم په قانون، د ملګرو ملتونو په قانون، په انساني قانون، پر دې باندې زموږ د بچیانو حق مقدم او مقدس دی. او دا حق به غواړو.»
نوموړي زیاته کړه چې افغانستان و پاکستان ته هېڅ زیان نه دی رسولی او د سیمې ټولو هېوادونو ته د امینت پرځای کولو لپاره په شریکه کار پکار دی.
ښاغلي اڅکزي ویلي«افغانستان یوه خبره غواړي چې پاکستان، ایران او ګاونډي هېوادونه به د افغانستان استقلال تسلیموي. چې دا یو ازاد دولت دی، اوس چې یو بداعتمادي راغلې ده، دا زه هسې یو ځاني خبره کوم، امریکايي پوځونه هلته موجود دي، چین زموږ یو لوی ګاونډی هېواد دی، له هندوستان سره خو پاکستان په جګړه کې دی، نو د چین، امریکا او ایران په مخې کې دا خبره په اسانه کېدلای شي، چې پاکستان دولت دا خبره ورسره وکړي چې دوی د افغانستان استقلال او ازادي مني.»
محمود خان اڅکزي وویل، که پاکستان دولت یو خپلواک افغانستان ومني، نو له دې سره به دې سیمې او پاکستان ته هم ډېره ګټه ورسېږي.
جمهور آژآنس