پاکستان به هېڅکله په افغانستان کې عملیات ونه کړي

د پاکستان د ملي امنيت سلاکار سرتاج عزيز وايي چې د دغه هېواد ځواکونه به هېڅکله د افغانستان په خاوره کې پوځي عمليات ترسره نه کړي.
سرتاج عزيز دغه څرګندونې د ليندۍ په ٢٩مه، په اسلام اباد کې د ( پرمختګ، ديموکراسۍ او سولې) تر نامه لاندې

په يوه سيمينار کې تر ګډون وروسته خبريالانو ته کړې دي.
هغه زياته کړې چې پاکستان به له افغانستان سره يو ځاى د ترهګرۍ پر ضد ګډ عمليات ترسره کړي.
سرتاج عزیز ویلي، چې پاکستان به هېڅکله د افغانستان خاورې ته ور نشي او نه به هم د دواړو هېوادونو ځواکونه د يو بل خاورې ته ننوځي.
هغه زياته کړې، افغان ولسمشر دوى ته ډاډ ورکړى، چې خاوره او سرحدونه به يې د ترهګرو په ګټه نه کارول کېږي او دوى يې دغو څرګندونو ته په مثبت نظر ګوري.
دی وايي، چې هېواد يې د ترهګرۍ پر ضد له افغانستان سره هر ډول مرستې او همکارۍ ته تيار دى. د پاکستان د ملي امنيت سلاکار وايي، چې هېواد يې د ترهګرۍ تر ټولو زيات ښکار شوى.
سرتاج عزیر دغه خبرې پر داسې مهال کوي، چې په پېښور کې پر یوه پوځي ښوونځي تر برید او کابل ته د پاکستان د لوی درستیز تر سفر وروسته پاکستاني رسنیو داسې راپورونه خپاره کړل، چې ګڼې راحیل شریف افغان چارواکو ته ویلي، چې که په خپله خاوره کې د ترهګرۍ پر وړاندې جدي مبارزه ونه کړی نو پاکستاني پوځیان به له پولې دې خوا ته د وسله والو پر وړاندې عملیات پیل کړي.
پاکستاني رسنیو دا هم ویلي وو، چې ګڼې درې خوا، افغان، پاکستاني او ایساف چارواکو د پولې په دواړو غاړو کې ګډو عملیاتو پر سر هوکړه کړې.
خو د افغانستان لوی درسیتز شېر محمد کریمي د پاکستاني رسنیو دغه ادعاوې رد کړې او ویلي یې دي، چې په هېڅ ډول ګډو عملیاتو موافقه نه ده شوې.
جمهور آژانس: کابل