ځینې پولیس له بشري حقونو سرغړاوی کوي

د افغانستان د بشر حقونو خپلواک کمېسیون د بشر د حقوقو د څار سازمان هغه راپور تایید کړی، چې په کې افغان پولیس په ناوړه چلند او له بشري حقونو په سرغړاوي تورن شوي وو.
د جمهور آژآنس د خبر له مخې د بشر د حقونو د څار سازمان د ۲۰۱۴ کال په کاري راپور کې لیکلي دي، چې په افغانستان کې اوس د پولیسو د سرغړونو په وړاندې معافیت په یو دود بدل شوی دی.
په راپور کې ویل شوی، چې د افغانستان په یو شمېر سیمو کې سیمه ییزو پولیسو

سم چلند نه لري او دوی د بشري حقونو څخه لویې لویې سرغړونې کوي.
د بشر د حقونو د څار سازمان په دغه راپور کې له افغان حکومته غوښتي چې د بشري حقونو د سرغړونو د مخنیوي؛ د قربانیانو لپاره د عدالت د تامینولو او په دغه هیواد کې د بنسټونو د خپلواکۍ د خوندیتوب لپاره هڅې وکړي.
د افغانستان د بشر د حقونو خپلواک کمیسیون د بشر د حقونو د څار د سازمان دغه راپور تاید کړی دی.
د افغانستان د بشر د حقونو خپلواک کمیسیون د هغو حکومتي مسوولینو په اړه چې له خپل موقف څخه ناسمه استفاده کوي اندېښنه ښودلې ده.
د دغه کمیسیون ویاند رفیع الله بیدار رسنیو ته ویلي، چې له دوی سره هم داسې موارد شته چې په افغانستان کې د ملي او سیمه ییزو پولیسو ناسم چلند په ګوته کوي.
ښاغلی بیدار وايي، حکومتي مسوولین چې سرغړونه کوي باید په جدي ډول د عدلي او قضايي تعقیب لاندې ونیول شي.
خو کورنیو چارو وزارت تر اوسه په دې اړه څه نه دي ویلي.
جمهور آژآنس: کابل