ولسمشرغني او حامد کرزي د نجیب الله مېړانه وستایله

د افغانستان ولسمشر محمد اشرف غني او پخواني ولسمشر حامد کرزي له پاکستاني ځواکونو سره په جګړه کې افغان افسر نجیب الله د خاورې په دفاع کې شهید او پر هېواد مین بچی وباله.
د جمهور آژآنس د خبر له مخې د پکتیکا ولایت د برمل ولسوالۍ د سرحدي پولیسو د افسر د دوهم ساتمن نجیب الله مېړانه وستایله، ویې ویل چې نوموړی د هیواد د ملي حاکمیت او مځکنۍ بشپړتیا د دفاع په لار کې شهید شو.
ولسمشر غني په یوه حکم کې د نجیب الله د زړه ورتیا د ستاینې تر څنګ د نوموړي د کورنۍ پاتې غړیو ته لوړ دولتي میډال او په کابل ښار کې د درو خونو اپاراتمان ورکړ.
د ولسمشر په حکم کې دا هم ویل شوي چې د پکتیکا ولایت د مرکز ښرنې ښار مرکزي چوک کې دې «شهید دوهم ساتمن نجیب الله چوک» ونومول شي.
دغه ولسمشر محمد اشرف غني په بل حکم کې د برمل ولسوالي د سرحدي پولیسو د ۴۰۲ زون اتم کنډک ته، چې نجیب الله یې هم غړی و، د مېړانې لوړ دولتي نښان او یوه میاشت اضافي معاش وباخښه.
په حکم کې ویل شوي چې د افغانستان ولسمشر د دې کنډک منسوبان په دې خاطر ستايي چې د افغانستان په خاوره کې یې د پردیو پوستو د جوړېدو مخه نیولې ده.
بل خوا د افغانستان پخواني ولسمشر حامد کرزي نجیب الله پر هېواد مین بچی ‌وباله او د له ورور جګړن امان الله سره تیلفوني خبرې وکړې.
حامد کرزي شهید نجیب الله ته د لوی خدای له درباره د فردوس جنت او کورنۍ او دوستانو ته یې د جمیل صبر غوښتنه وکړه.
حامد کرزي وویل: نجیب الله د دې خاورې یو رښتینۍ او په هېواد مین بچی ‌ؤ، چې د خپلې خاورې د ساتنې له پاره یې خپل ځان قربان کړ.
هغه وويل د ده شهامت، مېړانه او سرښندنه د ستاینې وړ ده او د افغانستان خلک به هېڅ کله هم د ده قربانی هېره نه کړي.
دوهم ساتمن نجیب الله وړمه شپه هغه مهال د پاکستاني پوځیانو له لوري شهید کړای شو.
ارواښاد نجیب الله او ملګرو یې پاکستاني پوځیان پرې نښوول چې د افغانستان په خاوره کې پوسته جوړه کړي.
جمهور آژآنس:کابل