داعش په ننګرهار کې یو تن اعدام کړی

د سیمې خلک او عیني شاهدان وايي، داعش وسله والو د عامو خلکو په وړاندې یو تن د افغان پوځ په لیکو کې د دندې تر سره کولو پر سر اعدام کړ.
د جمهور آژآنس د خبر له مخې دغه پېښه تېره شپه د ننګرهار په کوټ ولسوالۍ کې رامنځ ته شوې او وژل شوی ځوان یوسف نومېده او د ملي اردو سرتېری وو.
د سیمې خلک وايي، یوسف له دندې کور ته په رخصتی تللی او کله چې بېرته د دندې پر لور تله د داعش وسله والو له خوا نیول شوی وو.
عیني شاهدان وايي داعش وسله والو په زرو او جبر باندې خلک د یوسف د وژنې ننداره ته وروستل.
د دوی په خبره وسله والو یوسف په یوه پول پورې وتاړه او وروسته یې ورباندې ناتار ډزې وکړې او ویډیوګانې یې ترې ډکولې.
د سیمې خلک وايي هغه وسله وال چې ځان داعش بولي زیاتره یې په اردو خبرې کوي او د پوځ او ملېشو په شان روزل شوي دي.
خو د ننګرهار چارواکو تر اوسه په دې اړه څه نه دي ویلي.
باید وویل شي داعش څو ورځې وړاندې هم په یاده ولسوالۍ کې یو ۱۳ کلن هلک له خپله کوره راوستی او وروسته یې د خلکو په وړاندې په ډزو سره وژلی وو.
جمهور آژانس
معروف سادات:ننګرهار