پاکستان د نړۍ د بې رحمو تروریستانو سره نژدې اړیکې پالي

د جمهور آژآنس د خبر له مخې ښاغلي ذکریا په دغه مقاله کې زیاته کړې، چې پاکستان دا چل او مهارت زده دی چې عملاً د امریکا د وژونکو دښمنانو ملاتړ وکړي خو په ظاهره ځان د امریکا مرستندوی وښيي.
نوموړی د خپلې دې پوښتنه په ځواب کې چې د پاکستان د دې ستراتیژۍ په وړاندې امریکا باید څه وکړي؟ وايي، چې امریکا باید لومړی وګوري چې حقیقت څه دی، باید د پاکستان د پوځ په وړاندې خورا کلک دریځ غوره کړي او دا په زغرده ورته ووايي چې دوه مخي پالیسي بس کړي. دا کار به نه یوازې د افغانستان د ثبات لپاره ښه وي بلکې د پاکستان په خیر به هم وي.
ښاغلی ذکریا وايي، تر څو چې په پاکستان کې د تروریستانو د ملاتړ او تمویل مرکزونه له منځه نه وي تللي، امریکا په افغانستان کې د سولې د راوستلو لپاره خپلو هدف ته نه شي رسېدای.
هغه زیاته کړې، چې دی، باور لري چې د افغانستان مسله د دې حقیقت له منلو پرته حل کېدای نه شي چې د افغانستان د حکومت پر ضد جګړه د دغه هېواد په ګاونډي هېواد کې د یوه خورا غښتلي پوځ له لوري تنظیم، رهبري او تمویل کېږي.
نوموړي ویلي« غالباً به د امریکا چارواکي یا له حکومته د باندې ځیني کسان په دې پوهېږي خو هیڅوک نه پوهېږي چې په دې برخه کې څه وکړي. خو تر څو چې د دې ستونزې مخه نه وي نیول شوې طالبان به هېڅکله هم ونه ځپل شي، ځکه چې دا پخوانۍ مقوله ده چې هیڅ بلوا ضد جګړه تر هغو نه شي بریالۍ کېدای چې یاغیان پناهځای ولري خو د افغانستان په مورد کې یاغیان یو اتومي قدرت لرونکی ملاتړی لري.»
د دغه پوښتنې په ځواب کې چې ولي پاکستان د طالبانو ملاتړ کوي؟ فرید ذکریا په امریکا کې د پاکستان د پخواني سفیر حسین حقاني قوله ورکوي، او وايي، حقاني په خپل کتاب (Magnificent Delusions) کې له طالبانو څخه د پاکستان د ملاتړ عواملو ته په اشارې ویلي چې که حالات په طبیعي ډول پرېښودل شي (یعني پاکستان مداخله ونه کړي)، افغانستان د هند لور ته نژدې کېږي، چې په نیم قاره کې تر ټولو غښتلی هیواد دی.
جمهور آژآنس:کابل