افغانستان و تاجیکستان سند همکاری‌های استراتیژیک امضا می‌کنند

27 سنبله 1399 ساعت 14:39

وزارت امور خارجه کشور می‌گوید که افغانستان و تاجیکستان در آینده نزدیک، سند همکاری‌های استراتیژیک امضا خواهند کرد.


وزارت امور خارجه کشور می‌گوید که افغانستان و تاجیکستان در آینده نزدیک، سند همکاری‌های استراتیژیک امضا خواهند کرد.

به گزارش خبرگزاری جمهور؛ این وزارت، امروز پنجشنبه (27 سنبله) با نشر خبرنامه‌ای گفته که محمد حنیف اتمر سرپرست وزارت خارجه که در رأس یک هیأت بلند‌رتبه به دوشنبه پایتخت تاجیکستان سفر کرده است،
با همتای تاجیک خود آقای سراج الدین مهرالدین وزیر امور خارجهٔ جمهوری تاجیکستان، ملاقات کرد.

آقای اتمر ضمن ابراز سپاس و قدردانی از دعوت و پذیرایی گرم مقامات تاجیک، استقلال تاجیکستان را به دولت و ملت دوست و برادر تاجیک تبریک گفت و از حمایت‌های تاجیکستان از افغانستان در مواقع سخت و دشوار از جمله در امر مبارزه با کوید 19 سپاسگزاری کرد. آقای اتمر همچنان موضعگیری اصولی تاجیکستان را در حمایت از موقف افغانستان در خصوص صلح و مذاکرات با طالبان ستود.

آقای اتمر گفت: صلح افغانستان، صلح منطقه است و ما خواهان رسیدن به صلحی هستیم که در نتیجهٔ آن ارزش‌ها و دست‌آوردهای نظام جمهوری حفظ و تقویت شوند و طالبان به ارادهٔ آزاد مردم افغانستان احترام گذارند.

در پیوند به همکاری‌های امنیتی میان دو کشور، سرپرست وزارت خارجه ابراز داشت که دو کشور می‌توانند در دو سطح ملی و ولایتی باهم کار کنند و برنامهٔ مشترک امنیتی را در چارچوب همکاری‌های استراتیژیک طرح و عملی سازند.

آقای اتمر با اشاره به روابط تاریخی و فرهنگی میان افغانستان و تاجیکستان گفت:‌ ما خواهان گسترش روابط فرهنگی میان دو کشور استیم و این پیوندها را می‌توان از راه برگزاری هفته‌های فرهنگی، تجلیل از شخصیت‌های فرهنگی دو کشور و زمینه‌سازی برای آموزش محصلان افغانستان در تاجیکستان در مقاطع مختلف گسترش داد.

وزیر امور خارجه افغانستان روی اهمیت برگزاری هشتمین نشست کمیسیون همکاری‌های اقتصادی-تجارتی میان دو کشور تأکید کرده و با اشاره به حجم تجارت میان دو کشور و قابلیت افزایش آن گفت: افغانستان خواهان خریداری برق بیشتر از تاجیکستان می‌باشد و به این منظور رئیس برشنا موسسه در این سفر حضور دارد تا با همتایان تاجیک خود صحبت کند.

سپس آقای سراج‌الدین مهرالدین وزیر امور خارجه تاجیکستان ضمن ابراز خیر مقدم به آقای اتمر و هیأت همراه‌، از آغاز مذاکرات صلح افغانستان استقبال کرد و از حمایت کشورش از روند صلح به رهبری و مالکیت افغان‌ها اطمینان داد.

در خصوص همکاری‌های امنیتی، اقتصادی و ترانزیتی، آقای مهرالدین از طرح تدوین و امضای سند همکاری‌های استراتیژیک میان دو کشور استقبال کرد و خواهان توسعهٔ تجارت و ترانزیت و همچنین گسترش همکاری‌های فرهنگی میان افغانستان و تاجیکستان شد. آقای مهرالدین گفت: تاجیکستان تجربهٔ کافی در اعمار بندهای آب دارد و آمادهٔ همکاری با افغانستان در این خصوص می‌باشد.

وزیر خارجهٔ تاجیکستان در پیوند به سفر رئیس‌جمهوری تاجیکستان به مرز و گفتگو با مردم دروازها، تهدیدات مشترک تروریستی، مشکل قاچاق در امتداد سرحدات و نیاز به اقدام مشترک، نیز بحث‌های همه‌جانبه داشت و اطمینان داد که تاجیکستان از مبارزهٔ افغانستان علیه تروریزم و جرایم سازمان‌یافته حمایت می‌کند.

همچنین، حمایت تاجیکستان از عضویت کامل افغانستان در سازمان همکاری‌های شانگهای و سازمان امنیت و همکاری اروپا و فارمت‌های منطقه‌یی، برگزاری نشست‌های مشورت‌های سیاسی، توسعهٔ همکاری ترانسپورتی و ترانزیتی، احداث خط‌آهن پنج جانبه (چین، افغانستان، تاجیکستان، قرغزستان و ایران)، انتقال محموله‌های کمک‌های بشری از طریق خاک تاجیکستان به بدخشان افغانستان، استرداد محبوسین، ایجاد کمیسیون همکاری‌های امنیتی میان دو کشور و ایجاد یک راهکار جامع و موثر منطقه‌یی برای مبارزه با تروریزم، از موضوعات عمدهٔ بحث و تبادل نظر میان وزیران خارجه دو کشور بود.

گفتنی است که در حضورداشت وزیران خارجهٔ دو کشور، یادداشت تفاهم میان ادارات حفاظت از محیط زیست دو کشور به امضا رسید.

خبرگزاری جمهور- کابل
 


کد مطلب: 131674

آدرس مطلب: http://jomhornews.com/fa/news/131674/

جمهور
  http://jomhornews.com