معین سیاسی وزارت خارجه: افغانستان باید در تمام برنامه‌های اتحادیه اروپا برای آسیای میانه سهیم ساخته شود

30 میزان 1399 ساعت 7:31

میرویس ناب، معین سیاسی وزارت امور خارجه کشور می‌گوید که افغانستان باید در تمام برنامه‌های اتحادیهٔ اروپا برای آسیای میانه از جمله پروژه‌های مشترک زیربنایی، شریک و سهیم ساخته شود.


میرویس ناب، معین سیاسی وزارت امور خارجه کشور می‌گوید که افغانستان باید در تمام برنامه‌های اتحادیهٔ اروپا برای آسیای میانه از جمله پروژه‌های مشترک زیربنایی، شریک و سهیم ساخته شود.

به گزارش خبرگزاری جمهور؛ وزارت امور خارجه گفته که آقای ناب، در نشست دیالوگ سیاسی و امنیتی مشترک میان اتحادیهٔ اروپا، افغانستان و کشورهای آسیای میانه (تاجیکستان، اوزبیکستان، قرغزستان، قزاقستان و ترکمنستان) که از طریق ویدیو کنفرانس برگزار شده بود، از شهر آتن-یونان اشتراک و‌ سخنرانی کرد.

این نشست با سخنرانی افتتاحیهٔ خانم هیلگا شیماید سرمنشی ادارهٔ اقدامات خارجی اتحادیهٔ اروپا آغاز شد. وی در مورد همکاری‌های مشترک در مبارزه با کوید-۱۹، برنامه‌های زیربنایی منطقه و حمایت از مذاکرات صلح افغانستان صحبت کرد.

سپس آقای ناب، در سخنرانی خویش ضمن سپاسگزاری از نقش مثبت اتحادیهٔ اروپا برای نزدیکی افغانستان با آسیای میانه، در مورد پیشرفت‌های مذاکرات صلح افغانستان، همگرایی بیشتر افغانستان با آسیای میانه، پروژه‌های زیربنایی منطقه‌یی، مبارزه با تروریزم و مواد مخدر و حفظ محیط زیست صحبت کرد.

 معین سیاسی صلح و ثبات در افغانستان را به نفع ثبات در منطقه خوانده گفت: مردم و حکومت افغانستان خواهان حمایت اتحادیهٔ اروپا و کشورهای آسیای میانه از مذاکرات صلح به رهبری دولت افغانستان می‌باشند.

 او همچنان یادآور گردید که افغانستان باید در تمام برنامه‌های اتحادیهٔ اروپا برای آسیای میانه، از جمله برنامه‌های ظرفیت‌پروری در عرصه‌های محیط زیست و پروژه‌های مشترک زیربنایی شریک و سهیم ساخته شود.

در ادامه سرمنشی ادارهٔ اقدامات خارجی اتحادیه اروپا و معینان وزارت‌‌های امور خارجه کشورهای آسیای میانه از آغاز مذاکرات صلح افغانستان به مالکیت افغانستان استقبال نموده، حمایت خویش را از این روند اعلام کردند.

همچنان، اتحادیهٔ اروپا و کشورهای آسیای میانه از تلاش‌های مشترک در راستای مبارزه با موج دوم کوید-19، اتصال منطقه‌یی و دخیل‌ساختن افغانستان در پروژه‌های منطقه‌یی، به ویژه خط آهن، انرژی و فایبر نوری، همکاری در راستای محیط زیست قدردانی و برای همکاری مشترک اعلام آماد‌گی کردند.

خبرگزاری جمهور- کابل
 
 


کد مطلب: 132679

آدرس مطلب: https://www.jomhornews.com/fa/news/132679/

جمهور
  https://www.jomhornews.com