معینان وزارت‌های امور خارجه افغانستان و تاجیکستان دیدار کردند

معینان وزارت‌های امور خارجه افغانستان و تاجیکستان در مورد گسترش روابط دو کشور دیدار و گفتگو کرده‌اند.

به گزارش خبرگزاری جمهور؛ وزارت امور خارجه امروز سه‌شنبه (12 حوت) با نشر اعلامیه‌ای گفته که میرویس ناب معین سیاسی وزارت امور خارجه با همتای تاجکی‌اش آقای خسرو ناظری در شهر دوشنبه پایتخت جمهوری تاجیکستان، دیدار کرده‌است.

بر بنیاد اعلامیه، در این دیدار، هر دو‌جانب راجع به آمادگی‌های نهمین کنفرانس وزرای خارجه قلب آسیا پروسۀ استانبول تبادل نظر کرده، برگزاری این کنفرانس را در تقویت اجماع منطقه‌یی و بین‌المللی برای حمایت از گفتگو‌های صلح افغانستان مهم خواندند.

بر بنیاد اعلامیه، در ادامه، معینان وزارت‌های خارجه دو کشور، پیرامون نهایی‌سازی موافقتنامه‌های دوجانبه میان کابل و دوشنبه تا قبل از برگزاری نهمین کنفرانس قلب آسیا- پروسۀ استانبول صحبت کرده، امضای موافقتنامه استراتیژیک میان کشورهای متبوع شان را در گسترش روابط میان دولت‌ها و مردمان دو کشور با هم برادر، مهم و ارزنده خواندند.

گفتنی است که افغانستان و تاجیکستان روابط نیک دارند. تاجیکستان از نفوس گروه‌های افراطی در مرز خود با افغانستان نگران است.

خبرگزاری جمهور- کابل