شورای علمای اسلامی تاجیکستان از مردم این کشور دعوت کرد که علیه ویروس همه گیر کرونا واکسینه شوند.
شورای علمای مرکز اسلامی تاجیکستان با اعلام این مطلب، واکسیناسیون را برای حفظ صحت شهروندان این کشور ضروری عنوان کرده است.
این مرکز همه میهن پرستان تاجیکستان، پیش از همه، ساکنان پیر را به خاطر صحتمندی خود و اطرافیانشان دعوت کرده است تا بلافاصله واکسینه شوند.
این سازمان معنوی تاجیکستان در ادامه هشدار داده اند که  امتناع از واکسیناسیون می‌تواند عواقب منفی داشته باشد.
شایان ذکر است که در تاریخ 8 مارچ امسال در چارچوب برنامه «کواکس» اولین محموله شامل 19 هزار دوز واکسین «آسترازنکا» وارد تاجیکستان و 22 مارچ کمپاین واکسیناسیون در این کشور آغاز شد.
بنابر گزارش وزارت صحت تاجیکستان، در مرحله اول کارمندان موسسات صحی ، افراد بالا 60 سال، افراد مبتلا به بیماریهای مزمن غیر واگیر، کارمندان بخش های استراتیژیک اقتصاد واکسینه می شوند.
واکسیناسیون در دو مرحله با فاصله 8 تا 12 هفته صورت می‌گیرد. به طور کلی، در تاجیکستان حدود 5.8 ملیون نفر باید واکسینه شوند.
طبق آمار وزارت صحت تاجیکستان، از ابتدای سال روان میلادی در این کشور هیچ مورد ابتلا به ویروس همه گیر ثبت نشده است.