بلال کریمی یکی از سخنگویان طالبان اظهارات امام علی رحمان رییس جمهور تاجیکستان مبنی بر موجودیت کمپ‌های تروریستی در خاک افغانستان، را رد کرده است.

به گزارش خبرگزاری جمهور؛ این سخنگوی طالبان امروز سه‌شنبه (21 جدی) در تویترش نوشته که ادعای رییس جمهور تاجیکستان که گویا کمپ‌های به اهداف تخریبی در مناطق مرزی افغانستان با تاجیکستان ایجاد شده، حقیقت ندارد و "ما با قاطعیت این ادعا را رد می‌کنیم."

بلال کریمی تاکید کرده که "امارت اسلامی به تمامی همسایه‌ها اطمینان می‌دهد که سرحدات ما محفوظ است و به شمول تاجیکستان هیچ کشور خارجی از خاک افغانستان تهدید نخواهد شد."

به گفته او، طالبان با تمام کشورها روابط نیک می‌خواهد.

او یاد آور شده که "برخی افراد مغرض، مخرب و فراری به جامعه جهانی به ویژه کشورهای همسایه معلومات غلط می‌دهند که به هیچ وجه درست نیست."

این در حالی است که امام علی رحمان رییس جمهور تاجیکستان به روز دوشنبه (20 جدی) در نشست ویژه پیمان امنیت جمعی از کشورهای عضو خواست که در اطراف افغانستان یک کمبرند امنیتی ایجاد کنند.

گفتنی است که روسیه، تاجیکستان، بلاروس، قزاقستان و قرغیزستان در این نشست مجازی شرکت کرده بودند.

اما علی رحمان در این نشست گفت: "به طور کلی بر اساس اطلاعات تاجیکستان، بیش از 40 اردوگاه و مرکز آموزش تروریستها در ولایت‌های شمال شرقی افغانستان وجود دارد که بیش  از شش هزار شبه نظامی را در خود جای داده است."

او همچنین تاکید کرد که وضعیت در مرز تاجیکستان و افغانستان هر روز پیچیده‌تر می‌شود و درگیری‌های درونی طالبان درست در امتداد مرز رخ می‌دهد.

به گفته او، هفته گذشته بیش از 11 نیروی طالبان در اثر درگیری بین خودی در نزدیکی مرز کشته و 18 تن دیگر زخمی شده‌اند.

پیش از این، قاسم جومارت توکایف، رییس جمهور قزاقستان نیز در پی اعتراضات گسترده و خشونت بار در این کشور گفت که جنگجویانی از افغانستان در این اعتراضات خشونت‌آمیز که عمدتاً در شهر آلماتا پایتخت این کشور متمرکز بود، دست داشته اند.

خبرگزاری جمهور- کابل