رسانه‌های تاجیکستان به نقل از مرکز مطبوعات نیروهای مرزبانی این کشور گزارش دادند که گلوله‌هایی از خاک افغانستان به خانه‌های تاجیکستانی‌ها اصابت کرده اند.

به گزارش خبرگزاری جمهور؛ این مرکز ناوقت روز دوشنبه (19 ثور) اعلام کرد که گلوله‌های ناشی از درگیری میان طالبان با گروه داعش در تخار، به طور تصادفی به خاک تاجیکستان اصابت کرده است.

خبرگزاری دولتی خاور به نقل از این مرکز گفته که طالبان و داعش دو روز قبل در امتداد مرز تاجیکستان برای یک ونیم ساعت درگیر شده بودند.

بر بنیاد گزارش، در جریان این درگیری گلوله‌هایی به‌گونه تصادفی از مرز عبور کرده و برخی آنان به خانه‌های تاجیکستانی‌ها نیز اصابت کرده اند. در این گزارش از تلفات جانی و خسارات مالی آن چیزی گفته نشده است.

این رسانه درباره‌ی نوعیت گلوله چیزی نگفته است؛ اما ادعا شده بود که گروه داعش از خاک افغانستان علیه تاجیکستان موشک شلیک کرده است.

طبق گزارش، نیروهای طالبان در حال حاضر در منطقه خواجه غار ولایت تخار برای شناسایی و خنثا‌کردن گروه‌های تروریستی اقدامات مشخصی را انجام می‌دهند.

گفته شده که نیروهای مرزی تاجیکستان نیز در حالت آماده‌باش قرار دارند و امکانات کافی برای حفاظت از مرز را دارند.

این در حالی است که کشورهای آسیای مرکزی از جمله تاجیکستان همواره از فعالیت داعش در افغانستان ابراز نگرانی کرده است. اما؛ طالبان همواره اطمینان داده اند که هیچ کشوری از خاک افغانستان تهدید نخواهند شد.

خبرگزاری جمهور- کابل