مولوی عبدالسلام حنفی معاون اداری رئیس الوزرای حکومت سرپرست طالبان با عبدالعزیز کاملوف مشاور امنیت ملی و نماینده رئیس جمهور اوزبیکستان در سیاست خارجی آن کشور دیدار کرده و بر تحکیم روابط دوجانبه در تمام عرصه‌ها تاکید کرده است.

به گزارش خبرگزاری جمهور؛ ارگ امارت اسلامی شب گذشته(29 جوزا) در صفحه تویترش نوشته:" مولوی عبدالسلام حنفی معاون اداری ریاست الوزراء امارت اسلامی افغانستان روز گذشته با عبدالعزیز کاملوف مشاور امنیت ملی و نماینده رئیس جمهور اوزبیکستان در سیاست خارجی آن کشور دیدار کرده است".

مولوی حنفی در این دیدار مناسبات افغانستان و اوزبیکستان را برادرانه و دوستانه خوانده و گفته که روابط افغانستان با اوزبیکستان برای ما اهمیت زیادی دارد و در چند ماه اخیر درنشست‌ها و ملاقات‌های که میان هیات‌های ا.ا.ا و جمهوری اوزبیکستان صورت گرفته نتایج خوبی درقبال داشته است.

معاون اداری ریاست الوزراء ضمن قدردانی از کمک‌های بشردوستانه اوزبیکستان به افغانستان و تاکید بر تداوم آن، گفته امیدواریم که دیدار امروز ما درخصوص تحکیم روابط دوجانبه در تمام عرصه‌ها مثمر واقع شود.

عبدالعزیز کاملوف مشاور امنیت ملی اوزبیکستان  نیز در این دیدار بر گسترش و تحکیم روابط میان دو کشور درعرصه‌های مختلف ازجمله تجارت و ترانزیت و تطبیق پروژه‌های خط آهن تاکید کرده است.

گفتنی است که مشاور امنیت ملی اوزبیکستان روز گذشته به کابل آمده و با مقامات امارت اسلامی دیدار کرده است.

خبرگزاری جمهور- کابل