د جمهور خبري آژانس مرکز 23 عقرب 1398 ساعت 10:35 http://jomhornews.com/ps/news/122220/ -------------------------------------------------- ننګرهار: سرليک : ۳۰۰ داعشیان تسلم شوي او تر زرو پورې جنګیالي یې کنړ ته تښتېدلي -------------------------------------------------- په ختیځ کې د افغان پوځ چارواکي وايي، ننګرهار ولایت کې تر اوسه پورې ۳۰۰ داعشیان افغان ځواکونو ته تسلیم شوي او سلګونه نور یې کونړ ولایت ته تښتېدلي دي. متن - منځ : په ختیځ کې د افغان پوځ چارواکي وايي، ننګرهار ولایت کې تر اوسه پورې ۳۰۰ داعشیان افغان ځواکونو ته تسلیم شوي او سلګونه نور یې کونړ ولایت ته تښتېدلي دي. د جمهور آژانس د خبر له مخې په ننګرهار کې له تېرې څه باندې یوې میاشتې راهیسې افغان ځواکونو د داعش پر ضد سخت عملیات پیل کړي دي. د افغان ځواکونو داعش ضد عملیات تر ډېره په اچین ولسوالۍ کې چې د داعش مرکز بلل کېږي او دغه راز په خوږیاڼو او ځینو نورو ولسوالیو کې پیل شوي دي. په ختیځ کې د افغان پوځ چارواکي وایي، د دغه عملیات له پیل راهیسې په تېره یوه اوونۍ کې ۳۰۰ داعشیان افغان ځواکونو ته تسلیم شوي دي. په اچین ولسوالۍ کې د عملیاتو د ځانګړو ځواکونو قوماندان ولي الله وايي، په تسلیم شویو داعشیانو کې ډېری پاکستانیان دی، چې ښځې او ماشومام هم ورسره دي. تسلم شوي پاکستاني داعشیان تر ډېره پورې د ډورنډ کرښې د پورې غاړې قبایلي سیمې اورکزو ایجنسۍ اوسېدونکي دي، چې دوی هم د افغان ځواکونو له خوا د سختو عملیاتو پر تر سره کېدو اعتراف کړی دی. دغه تسلیم شوي داعشیان وایي، په دوی د افغان ځواکونو له خوا سخت عملیات روان دي، چې له مخې یې دوی مجبور شول، چې ځان ورته تسلیم کړي. تسلیم شوي داعشیان وايي، د جګړې په لیکو کې یې د افغانستان د مختلفو سیمو د جنګیالیو تر څنګ د چیچنیا، پاکستان، ازبکستان، تاجکستان، اردن، عراق، سوریې او نور اوسېدونکي هم وو. دغه داعشیانو دا هم ویلي، چې د افغان ځواکونو د سختو عملیاتو له امله یې له ۵۰۰ تر ۱۰۰۰ پورې جنګیالي له ننګرهار څخه کونړ ولایت ته تښتېدلي دي. خو افغان چارواکي ټینګار کوي، چې د داعش پر ضد به د افغان ځواکونو عملیات تر هغې دوام وکړي، تر چې د دغه ډلې جرړې وچې شوې نه وي. افغان لوړپوري امنیتي چارواکي وایي، په ننګرهار ولایت کې یې داعش ته بشپړه ماتې ورکړې او دغه ډله د محوه کېدو په حال کې ده او دغه راز به په کونړ ولایت کې هم د هغوی پر ضد ځپونکي عملیات پیل کړي. جمهورخبري آژانس:کابل