د جمهور خبري آژانس مرکز 29 ثور 1399 ساعت 11:08 http://jomhornews.com/ps/news/127958/ -------------------------------------------------- سرليک : د ولسمشرغني او عبدالله هوکړ کورني او نړیوال غبرګونونه -------------------------------------------------- د ولسمشر محمد اشرف غني او پخواني اجرائیه رییس عبدالله عبدالله ترمنځ سیاسي هوکړې ته په کور او بهر بېلا بېل غبرګونونه ښودل شوي او دا هوکړه یې ستایلې ده. متن - منځ : د ولسمشر محمد اشرف غني او پخواني اجرائیه رییس عبدالله عبدالله ترمنځ سیاسي هوکړې ته په کور او بهر بېلا بېل غبرګونونه ښودل شوي او دا هوکړه یې ستایلې ده. د جمهور آژانس د خبر له مخې د ښاغلي غني او عبدالله ترمنځ پرون سیاسي هوکړه وشوه، چې له مخې یې عبدالله د ملي مصالحې د شورا مشر او په حکومت کې د ۵۰ سلنه وندې څښتن شو او جنرال دوستم په کې مارشال شو. کورني غبرګونونه: دغه هوکړې ته په غبرګون کې د ولسمشر غني لومړي مرستیال امرالله صالح ویلي، ډېرو کړیو غوښتل چې د دې هوکړې لپاره اساسي قانون مات شي، خو په وینا یې داسې به نه کېږي. هغه د چا یا کومې کړۍ نوم وانخیست خو ټینګار یې وکړ، چې نور به د حکومت مشري یوه وي، یوه مقام ته به راپور ورکول کېږي او د ناز او نخرو دوره ختمه شوې ده. مخکني ولسمشر حامد کرزي د هوکړې د لاسلیک په مراسمو کې د ملي مصالحې شورا رامنځ ته کېدل یو مهم ګام وبله او هیله یې څرګنده کړه، چې د سولې لپاره روانې هڅې افغان شي او نور جګړه ودرېږي. جهادي مشر استاد عبدالرب رسول سیاف هم د ولسمشر غني او عبدالله مننه وکړه، چې د منځګړو هڅو ته یې درناوی وکړ او په ځانګړي ډول یې له ښاغلي غني نه مننه وکړه، چې راتلونکي ته یې وکتل او حوصله یې وکړه. د بهرنیو چارو سرپرست وزیر حنیف اتمر هم دا هوکړه تاریخي بللې او ولسمشر غني او عبدالله ته یې مبارکي ویلې ده. د وحدت ګوند مشر او د عبدالله مهم سیاسي ملاتړي محمد محقق هم د دې هوکړې هرکلی کړي او هیله یې ښودلې، چې دا هوکړه د افغانستان د خلکو لپاره له برکته ډکه وي. بهرني غبرګونونه: د امریکا د بهرنیو چارو وزیر مایک پمپیو د هوکړې له لاسلیک وروسته له ولسمشر غني او عبدالله سره تلېفوني خبرې کړې او مبارکي یې ورکړې ده. پمپیو په خپلو خبرو کې یو ځل بیا ویلي، چې د سیاسي جوړجاړي له لارې په افغانستان کې د جګړې ختمېدل او سوله د امریکا لومړیتوب دي. نوموړي پر خپله ټوېټر پاڼه هم لیکلي، خوښ دی، چې افغان ولسمشر محمد اشرف غني او عبدالله عبدالله یو ټولشموله حکومت پر جوړولو سلا شوي دي. د امریکا د بهرنیو چارو وزیر مایک پمپیو له ښاغلي غني او عبدالله مننه کړې، چې په افغانستان کې یې سملاسي سولې ته ژمنتیا ښودلې ده. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم د دغه هوکړې هرکلی کړی، خو وايي، دواړه مشران باید د ملي یووالي حکومت تېروتنې تکرار نه کړي. په افغانستان کې د ملګرو ملتونو استازولی یوناما هم په یوه بیان کې د دې سیاسي هوکړې د هرکلي تر څنګ ویلي، د هوکړې سره به افغان مشران د هغو یو خطرونو سره د مبارزې لپاره جوګه شي، چې افغانستان ورسره مخ دی. یوناما تمه ښودلې، چې د همکارۍ روحیه به دوام وکړي او د حکومت ټول غړي به په ګډه د ښې حکومتولۍ، قانون حاکمیت او د فساد ضد برخه کې پرمختګونه لا پیاوړي کړي. د ناټو سرمنشي ینس سټولټنبرګ په یوه اعلامیه کې د خپلمنځي اختلاف ختمولو او د یو ټولشموله حکومت جوړولو لپاره د افغان سیاسي مشرانو د پرېکړې هرکلی کړی دي. په اعلامیه کې ویل شوي، چې د کرونا وبا او د افغانانو پر ضد د طالبانو د زیاتېدونکي تاوتریخوالي په حال کې ډېره اړینه ده چې ټول افغان مشران په خپل هېواد کې د سولې لپاره ګډ کار وکړي. اعلامیه کې پر طالبانو غږ شوی چې تاوتریخوالی کم کړي، بین الافغاني مذاکراتو کې برخه واخلي او د سولې او افغانانو د ګټې لپاره جوړجاړی وکړي. ایران، پاکستان، ترکیې او ځینو نورو هېوادونو هم د دغه هوکړې هرکلی کړی او له ټول شموله حکومت سره یې د سولې په برخه کې د همکارۍ ډاډ ورکړی دی. د ایران د بهرنیو چارو وزیر جواد ظریف د هوکړې تر لاسلیک وروسته له عبدالله سره تلېفوني خبرو کې د یادې هوکړې ستانیه کړې ده. عبدالله عبدالله پر فیسبوک په خپله پاڼه یوه بیان کې ویلي دې تلفوني خبرو کې ښاغلي ظریف د اوربند او د سیمه ییزې اجماع د رامنځته کېدو لپاره د ملاتړ ډاډ ورکړی. د پاکستان د بهرنیو چارو وزارت هم په یوه اعلامیه کې په افغانستان کې د یو ټولشموله حکومت جوړېدو او د ملي پخلاینې د عالي شورا رامنځته کېدو هرکلی کړی دی. اعلامیه زیاتوي، د امریکا او طالبانو خپلمنځي هوکړه یو طلایي فرصت دی او ټولې ښکېلې غاړې باید په افغانستان کې د سولې او پخلاینې لپاره له دې فرصته ګټه پورته کړي. جمهورخبري آژانس:کابل