د فراه د پشت کوه ولسوالۍ د پولیسو استخباراتي امر وژل شوی

سیمه ییز چارواکي وايي، د فراه ولایت د پوشت کوه ولسوالۍ د امنیه قوماندانۍ د امنیت امر د وسله والو طالبانو په یوه کمین کې وژل شوی دی.

د فراه د ولایتي شورا غړې شهلا ابوبکر جمهور خبري آژانس ته و ویل، چې دغه پېښه تېره ورځ د فراه ولایت مرکز فراه ښار ته نېږدې رامنځ ته شوې ده.

نوموړې زیاته کړه چې د پشت کوه ولسوالۍ د پولیسو د استخباراتو امر له یادې ولسوالۍ د فراه ښار په لور روان و، چې د لارې په اوږدو کې د طالبانو له کمین سره مخ او وژل شوی دی.

په ورته وخت کې د فراه مرستیال والي محمد یونس رسولي د دغه پېښې پخلۍ کوي او وايي چې د پشت کوه ولسوالۍ د پولیسو د استخباراتو امر د یادې ولسوالۍ له امنیه قوماندان سره یو ځای د فراه ښار په لور روان و، چې د وسله والو طالبانو له خوا وژل شوی دی.

وسله والو طالبانو هم د برید مسؤولیت منلی او ویلي یې دي، چې د استخباراتو د امر تر څنګ یې د هغه دوه ساتونکي هم وژلي دي.

دا په داسې حال کې چې څه موده وړاندې د فراه د امنیه قوماندانۍ د امنیت امر هم د وسله والو طالبانو په برید کې وژل شوی و.

جمهورخبري آژانس:فراه