د پاکستان د بهرنیو چارو وزرت پخواني وزیره حنا رباني کهر وايي، پاکستان باید له افغانستان سره اړیکو ته لومړیتوب ورکړي او خپلې اړیکې ورسره ښې کړي.
د جمهور آژانس د خبر له مخې مېرمن کهر ډان نیوز تلویزیون سره په مرکه کې ویلي، چې پاکستان ته له افغانستان سره د اړیکو ښه کېدا د پاکستان لپاره د امریکا او هند تر اړیکو مهمه ده.
نوموړې د پاکستان پر اوسنۍ بهرنۍ پالیسي نیوکه وکړه او د پاکستان بهرنۍ پالیسي د خواشینۍ وړ وبلله.
مېرمن کهر ویلي« د سیمې له هیوادونو، په ځانګړي ډول له ګاونډیو هیوادونو سره د اړیکو له پراختیا پرته ادعا نه شو کولی چې پاکستان په بهرنۍ پالیسي کې سم لور ته روان دی.»
د پاکستان د بهرنیو چارو پخوانی وزیر وايي د دې پالیسۍ له کبله نه یوازې له هند سره د پاکستان اړیکې لا زیاتې ترینګلې شوي؛ بلکې پاکستان اوس له افغانستان او ایران سره هم چندان ښې اړیکې نه لري.
هغې و ویل، چې دا مهال له افغانستان سره د اختلافونو له منځه وړل او ورسره د ښو اړیکو ټینګول له امریکا او هند سره د اړیکو تر عادي کولو هم مهم دي.
په ورته وخت کې نوموړې له امریکا سره د ترهګرۍ پر ضد د پاکستان همکاري یوه تېروتنه و وبلله او ویلي یې دي، چې پاکستان باید دا تېروتنه دوهم ځلي تکرار نه کړي.
جمهورخبري آژانس:کابل
