روسیه او پاکستان له داعش سره د مبارزې ګډ پوځي کمېسیون جوړوي

روسي او پاکستاني چارواکي وايي، دواړه هېواد د پوځي همکاریو یو کمېسیون جوړوي، چې پر مټ یې په سیمه کې د داعش د خطر مخنیوی وکړي.

د جمهور خبري آژانس د خبر له مخې دغه څرګندونې د روسیې او پاکستان د بهرنیو چارو وزیرانو سرګي لاوروف او خواجه آصف په مسکو کې کړې دي.

خواجه آصف تېره ورځ مسکو ته په دوه ورځني سفر تللی او پاکستاني رسنیو ویلي، چې هغه له خپل روسي سیال سره پر نورو موضوعاتو سربېر پر افغانستان هم خبرې وکړي.

له لاوروف سره تر لیدنې وورسته دواړو بهرنیو چارو وزیرانو امریکا تورنه کړې، چې په افغانستان کې د داعش پر وړاندې هغسې کوټلي ګامونه چې په کار دي نه یې دي اخستي.

د روسیې د بهرنیو چارو وزیر سرګي لاروف ویلي، روسیه په افغانستان کې د داعش د مخینوي په برخه کې د امریکا او ناټو پر هڅو شک لري.

لاروف وویل « له بده مرغه موږ خبر یو، چې امریکا په افغانستان کې د داعش حضور بېخي مني نه، او داسې ښيي، چې ګڼې داعش په دې هېواد کې نشته.»

د پاکستان د بهرنیو چارو وزیر خواجه اصف هم د لاروف اندیښنې او څرګندونې تاييد کړې او ویې ویل«امریکا او افغانستان بېخې دا نه مني چې په دغه ملک کې د داعش فعالیتونه او حضور زیات شوی دی. د داعش ډله منځنۍ اسیا، پاکستان چین او روسیې ته خطر پېښوي، دا ډیره د خطر خبره ده.»

په ورته وخت کې د روسیې د بهرنیو چاررو وزیر دا هم و ویل چې هېواد یې د پاکستان د ترهرۍ ضد پالیسۍ تاييدوي او په دغه کې د ټولې سیمې ګټه ده.

روسي او پاکستاني چارواکي پر داسې مهال دغه څرګندونې کوي، چې امریکايي او افغان چارواکو په وار وار ویلي، چې په افغانستان کې داعش سخت ځپل شوی او لا یې هم پر وړاندې جدي عملیات روان دي.

په ورته وخت کې افغانستان د پاکستاني چارواکو د دې ادعا چې افغانستان کې مخ پر پراخېدو دی وايي، په سلو کې ۸۰ داعشیان د پاکستان له خاورې افغانستان ته را اوړي او زیاتره یې پاکستانیان دي.

له دې سره افغان چارواکي او سیاسي شنوونکي دا هم وايي، چې په افغانستان کې اکثریت داعشیان هغه طالبان دي، چې په پاکستان کې اوسي او له همغه ځایه یې ملاتړ کېږي.

د افغانستان د ملي امنیت پخواني رییس امرالله صالح ایران کې د یوې غونډې پر مهال ویلي و، چې افغانستان کې د داعش ۹۰ سلنه جنګیالي د حقاني شبکې غړي دي.

جمهورخبري آژانس:کابل