پاکستاني رسنیو راپور ورکړی چې پاکستاني طالبانو عمر رحمان د خپل نوي مشر په توګه ټاکلی دی.
د جمهور آژانس د خبر له مخې پاکستاني طالبانو دغه ګام وروسته هغې اخیستی، چې د راپورونو پر بنسټ د پاکستاني طالبانو پخوانی مشر ملا فضل الله د امریکايي ځواکونو د بې پیلوټه الوتکې په یوه برید کې و وژل شو.
پاکستاني رسنۍ وايي، د ملا فضل الله تر وژل کېدو څو ورځې وروسته د پاکستاني طالبانو لوړ پوړو قوماندانانو عمر رحمان د خپل مشر په توګه وټاکه.
ویل کېږي عمر رحمان د پاکستاني طالبانو یو د مهم او لوړ پوړو کسانو څخه و چې د ملا فضل الله سره ډېر نېږدې و او د ګڼو بریدونو په طرحه کولو کې یې لاس درلود.
باید و ویل شي، چې ملا فضل الله د تېرې پنشنبې په ورځ د امریکا د بې پیلوټه الوتکې په یوه برید کې په کونړ ولایت کې و وژل شو.
امریکايي او افغان چارواکو د ملا فضل الله د وژل کېدو پخلی کړی دی.
د یادونې وړ ده، چې د پاکستاني طالبانو یو بل مهم غړی مولوي بهادر جان هم چې غوښتل یې له پاکستان وتښتي، د پېښور د بادشاه خان په هوایي ډګر کې د پاکستاني پولیسو له خوا ونیول شو.
جمهورخبري آژانس:کابل
