د افغان حکومت اجرایه رییس ډاکتر عبدالله عبدالله وایي، افغانستان حاضر دی چې د اوبو ستونزو د هواري په برخه کې د سیمې له هېوادونو سره ګډ کار وکړي.
د
جمهور خبري آژانس د خبر له مخې عبدالله دغه څرګندونې نن چهارشنبې د غبرګولي ۳۰ مه د تاجکستان په پلازمېنه دوشنبې کې د اوبو په اړه یوه ورځني کنفرانس ته وکړې.
نوموړي ویلي، د څښاک پاکو اوبو ته نه لاسرسی یوه نړیواله ستونزه ده چې افغانستان هم ورسره مخ دی.
اجرائیه رییس ټینګار کړی چې افغانستان د اوبو ستونزو د هواري په برخه کې د سیمې له هېوادونو سره ګډ کار کولو ته چمتو دی.
په ورته وخت کې د تاجکستان ولسمشر امام علي رحمان اوبه د دوامداره پرمختګ لپاره اړینې وبللې او وايي، نن سبا د سیمې په کچه د اوبو ستونزه موجود ده او ډېری خلک د څښاک پاکو اوبو ته لاسرسی نه لري.
باید و ویل شي، چې د (اوبه د دوامداره پرمختګ لپاره) کنفراس تنظیموونکي وایي، چې په یاد کنفرانس کې د ۱۱ هېوادونو استازو ګډون کړی دی.
ټاکل شوې عبدالله د تاجکستان، پاکستان او ترکمنستان له مشرانو سره هم وګوري او په بېلابېلو موضوعاتو په ځانګړي ډول به پر سوله، اقتصاد او د اړیکو پر پراختیا له دوی سره خبرې کوي او په یو شمېر برخو کې به تړونونه هم لاسلیک شي.
جمهورخبري آژانس:کابل