ناپېژانده وسله والو کسانو د لوګر ولایت په مرکز پل علم کې د نجونو او هلکانو یوه ښوونځي ته اور ورته کړی او سوځولی یې دي.
د جمهور آژانس د خبر له مخې دغه پېښه تېره (پنشنبې شپه د چنګاښ ۲۱ مه) د پل علم اړوند د جوی یک په سیمه کې رامنځ ته شوې ده.
د لوګر د والي ویاند شمشاد لاروی وايي، وسله والو کسانو لومړی د یاد شوي ښوونځي ساتونکي تړلي او بیا یې ښوونځي ته اور وروته کړی، چې ټول لوازم یې سوځېدلي دي.
دا د نجونو او هلکانو یو ابتدايي ښوونځی و، چې د لوګر د پوهنې ریاست د معلوماتو له مخې د شپږ سوه نه ډېرو زده کوونکو په کې زده کړې کولې.
تر اوسه د دغه پېښې مسؤولیت چا پر غاړه نه دی اخیستی.
دا په داسې حال کې ده، چې دوه شپې وړاندې هم وسله والو د پل علم اړوند شولک سیمې لومړنی ښوونځي سوځولی وو.
باید و ویل شي، چې دا مهال د دې ولايت په محمداغې ولسوالۍ کې هم ۳۹ ښوونځي د تېرې يوې اوونۍ راهيسې د زده کوونکو پرمخ تړل شوي دي.
د لوګر چارواکي وايي، ښوونځي طالبانو بند کړي، خو طالب ویاند ذبيح الله مجاهد له رسنيو سره په خبرو کې دا رد کړې چې ګني د دوی وسله والو په محمداغه او پل علم کې ښوونځي تړلي او يا يې سوځولي دي.
جمهورخبري آژانس:لوګر
