سیمه ییز چارواکي وايي، کونړ ولایت کې د سخت باران او توپان له امله پر ماشومانو یو دېوال نړېدلی، چې له امله یې ۷ تنو ته مرګ ژوبله اوښتې ده.
د
جمهور خبري آژانس د خبر له مخې دغه پېښه تېره ورځ دوشنبې د زمري ۸ مه مازیګر مهال د کونړ ولایت د سرکاڼو ولسوالۍ په مسلم آباد کلي کې رامنځ ته شوې ده.
د کونړ د والي ویاند عبدالغني مصمم وایي، په دغه سیمه کې سخت باران او توپان رامنځ ته شوي، چې له امله یې یو دېوال پر ماشومانو ورنړېدلی دی.
نوموړي زیاته کړې، چې د دېوال د نړېدو له امله پنځه ماشومان ځای پر ځای مړه شوي او دوه نور ټپیان شوي، چې د درملنې په موخه روغتون ته لېږدول شوي دي.
د کونړ د والي ویاند وايي، وژل شوي او ټپي ماشومان د څلورو کورنیو څخه و، چې د باران او توپان څخه د همدې دېوال خوا ته پټ شوي وو.
دی زیاتوي، چې د ټپیانو روغتیايي حالت د ډاډ وړ دی.
جمهورخبري آژانس:کونړ