راپورونه وايي، د لوی ملي ائتلاف د پلویانو له خوا په بلخ ولایت کې د ټاکنو د سیمه ییز دفتر دروازه بېرته پرانستل شوې ده.
د جمهور آژانس د خبر له مخې د لوی ملي ائتلاف پلویانو ۹ ورځې وړاندې د دغه دفتر دروازه تړلې وه او ویلي یې و، تر هغې به دغه کمېسیون کارکوونکو ته د کار اجازه ورنکړل شي تر څو د دوی غوښتنې نه وي منل شوې.
دوی د کمېسیون مخې ته پرلټ هم کړی وو او له تېرو ۹ ورځو راهیسې د ټاکنو کمیسیون د دفتر دروازه یې د کارکوونکو او مراجعینو پر مخ تړلې وه.
خو ویل کېږي، چې دغه معترضینو نن یکشنبې د تلې اوله د خپلو شرطونو له اېښودو وروسته اجازه ورکړې څو یاد کمیسیون خپل فعالیتونه بېرته پیل کړي.
باید و ویل شي، چې په ټاکنو کې د بایومټریک سیسټم تطبیق او له دې پروسې د سیاسي احزابو نظارت د یادو معترضینو اساسي غوښتنې دي.
دا په داسې حال کې ده، چې افغان ولسمشر محمد اشرف غني پرون ماښام د ټاکنو کمېسیون او امنیتي ارګانونو سره په یوه غونډه کې و ویل، چې د ټاکنیزو دفترونو د تړلو له پاره هېڅ ډول دلیل د منلو نه دي او ټاکنې باید په خپل وخت تر سره شي.
جمهورخبري آژانس:بلخ
