۰
د ملي دفاع وزیر:

په تېره میاشت کې تر ۱۲ زیاتو افغان پوځیانو ته مرګ ژوبله اوښتې

دوشنبه ۲ میزان ۱۳۹۷ ساعت ۰۸:۰۹
د ملي دفاع وزیر جنرال طارق شاه بهرامي وايي، تېره یوه میاشت له وسله والو سره په جګړه کې ۱۲۷۴ افغان پوځیانو ته مرګ ژوبله اوښتې ده.
په تېره میاشت کې تر ۱۲ زیاتو افغان پوځیانو ته مرګ ژوبله اوښتې
د ملي دفاع وزیر جنرال طارق شاه بهرامي وايي، تېره یوه میاشت له وسله والو سره په جګړه کې ۱۲۷۴ افغان پوځیانو ته مرګ ژوبله اوښتې ده.

د جمهور خبري آژانس د خبر له مخې بهرامي دغه څرګندونې پرون یکشنبې د تلې اوله د مشرانو جرګې په عمومي غونده کې کړې دي.

دغه غوندې ته پر بهرامي سربېره د کورنیو چارو وزیر ویس احمد برمک او د ملي امنیت رییس محمد معصوم ستانکزی هم د پوښتنو له پاره ورغوښتل شوي وو.

ملي دفاع وزیر د جګړې د زیاتېدو او افغان پوځیانو ته د مرګ ژوبلې اوښتو پخلی وکړ او ویې ویل، چې په تېره یوه میاشت کې سلګونه افغان پوځیانو ته مرګ ژوبله اوښتې ده.

نوموړي و ویل« له بده مرغه ملي اردو تېره میاشت ۵۱۳ شهیدان ۷۱۸ ټپیان او ۴۳ بندیان درلودل، چې په ټولیز ډول ۱۲۷۴ کسان کېږي.»

که څه ملي دفاع وزیر د افغان پوځیانو د زیاتې مرګ ژوبلې خبره ومنله خو په وینا یې وسله والو ته د دې درې، څلور برابره مرګ ژوبله اوښتې ده.

هغه افغان ځواکونو ته د زیاتې مرګ ژوبلې د اوښتو لامل دا په ګوته کړ، چې ګنې افغان پوځیان د شپې له خوا د هوايي ملاتړ له کمښت سره مخ دي، خو زیاته یې کړه، چې وزارت هڅه کوي دا کمی پوره کړي.

غونډې ته د کورنیو چارو وزیر ویس احمد برمک هم په خپلو خبرو کې د افغان امنیتي او دفاعي ځواکونو د زیاتې مرګ ژوبلې اوښتو پخلی وکړ.

نوموړي و ویل، چې هره ورځ تر ۳۰ پورې افغان پوځیان او پولیس وژل کېږي.

د کورنیو چارو وزیر د جګړې او ناامنیو د زیاتېدو یو لامل د افغانستان او امریکا تر منځ امنیتي تړون وباله او ویې ویل، چې ځینې هېوادونه دغه امنیتي تړون د ځان په زیان ګڼي او له همدې امله د وسله والو مخالفینو ملاتړ کوي، چې دغه ملاتړ په افغانستان کې د جګړې د زیاتېدو سبب شوی دی.

جمهورخبري آژانس:کابل
 
 
 
ستاسو نوم

ستاسو دبرېښنا ليک پته
ستاسو نظر *

تر ټولو ډېر لیدل شوي