افغانستان کې د ملګرو ملتونو مرستندویه پلاوي دفتر یا یوناما وايي، سږ کال په افغانستان کې د هوايي بریدونو پر مهال د ملکي وګړو مرګ ژوبله ۵۲ سلنه لوړه شوې ده.
د
جمهور خبري آژانس د خبر له مخې یوناما نن سه شنبې د تلې ۳ مه په یوه بیان کې ویلي، چې د ۲۰۱۸ کال په لومړیو شپږو میاشتو کې ۱۴۹ ملکي افغانان د هوايي بمباریو له امله وژل شوي او ۲۰۴ نور ټپیان شوي دي.
د سرچینې د معلوماتو پر اساس دا شمیر د ۲۰۱۷ کال د همدې مودې په پرتله د ملکي تلفاتو په کچه کې ۵۲ سلنه زیاتوالی ښيي.
د ملګرو ملتونو مرستندویه پلاوي دفتر اندیښنه ښودلې، چې د ټولو هوایي بریدونو د ملکي تلفاتو له نیمایي څخه زیاته برخه میرمنې او ماشومان جوړوي.
په بیان کې په هوايي بریدونو کې د ملکي تلفاتو ۵۲ فیصده مسولیت د افغان ځواکونو، ۴۵ فیصده بهرنیو ځواکونو او درې فیصده یې د دولت پلوه ځواکونو په غاړه اچولی دی.
یوناما دغه راپور پر داسې مهال خپروي چې پرون او وړمه ورځ په کاپسا او میدان وردګو ولایتونو کې د هوايي بریدونو پر مهال یو شمېر ملکي وګړو ته مرګ ژوبله اوښتې ده.
دغه دفتر په یاد بیان کې ویلي، چې د کاپسا په تګاب کې د هوايي برید پر مهال د ښځو او ماشومانو په ګډون ۹ تنه وژل شوي او زیات شمیر نور ټپیان شوي دي.
دغه راز د میدان وردګو ولایت په جغتو ولسوالۍ کې هم هوايي بریدونه شوي، چې حکومتي چارواکي یې مرګ ژوبله د وسله والو طالبانو خو ځايي اوسېدونکي یې ولسي وګړي بولي.
ویل کېږي دغلته هم د هوايي برید پر مهال د یوه کس د کورنۍ ۱۲ غړي وژل شوي، چې یوه په کې ښځه او نور پاتې ماشومان دي.
یوناما پر مسؤلو خواوو غږ کړی، چې په هوايي بریدونو کې ملکي کسانو ته د اوښتې مرګژوبلې د لاملونو د روښانه کولو لپاره په خپلواکه، بېپرې، شفافه او اغیزمنه توګه څیړنې وکړي.
دغې ادارې په جګړه کې ښکیلو خواوو غوښتي، چې د ملکي وګړو د ژوند خوندیتوب ته جدي پام وکړي او د عامو خلکو د مرګژوبلې د مخنیوي لپاره، نړیوالو بشردوستانه قوانینو ته پام اغېزمن ګامونه پورته کړي.
جمهورخبري آژانس:کابل