ولسمشر محمد اشرف غني وايي، د کندز ښار د ماسټر پلان له بشپړېدو سره به په دغه ښار کې د بیارغونې عملي کار پیل شي.
د
جمهور خبري آژانس د خبر له مخې له ارګه خپره شوې خبرپاڼه کې راغلي، چې ولسمشر غني پرون شنبه (د تلې ۲۱مه) د کندز له والي سره د کندز ښار د بیارغونې او پراختیا د ماسټر پلان د عملي کېدو او د کندز د حلقوي سړک د جوړېدو په اړه خبرې کړې دي.
دغه راز سرچینه وايي، ښاغلي غني د اریانا افغان هوايي شرکت ته دستور ورکړی چې کندز او نورو ولایتونو ته پروازونه پېل کړي.
خبرپاڼه زیاتوي، ولسمشر غني د صنعت او تجارت وزیر او په مالي او بانکي چاروکې خپل سلاکار ته سپارښتنه کړې چې د کندز د سپین زر شرکت د بیارغونې او فعالولو پلان جوړ کړي او ورته ویې سپاري.
باید و ویل شي، چې له ولسمشر سره په کتنه کې د کندز والي د شېرخان بندر د تصدیو د فعالېدو، په کندز ښار کې ماشومانو او ښځو ته د یوه روغتون دجوړېدو، د امام صاحب ولسوالۍ د سړک جوړېدو او د الچین د پله د بیا رغېدو غوښتنه کړې ده.
جمهورخبري آژانس: کابل