د کورنیو چارو وزارت وايي، د جنرال عبدالرازق اڅکزي ورور تادین خان اڅکزی د کندهار د امنیه قوماندان په توګه ټاکل شوی دی.
د جمهور آژانس د خبر له مخې دغه وزارت نن دوشنبې د تلې ۳۰ مه په یوه خبرپاڼه کې ویلي، چې تادین خان اڅکزی نن په رسمي ډول د کندهار د امنیه قوماندان په توګه معرفي شو.
په خبرپاڼه کې ویل شوي، چې د اړتیا په پام، د کورنیو چارو وزارت په وړاندیز او د ولسمشر غني په منظورۍ د شهید سترپاسوال عبدالرازق ورور تادین خان اڅکزی د کورنیو چارو وزارت د لومړي مرستیال پاسوال جانان بارکزي له خوا د کندهار د امنیه قوماندان په توګه رسمآ معرفي شو.
باید و ویل شي چې د کندهار امنیه قوماندان جنرال عبدالرازق او د کندهار د ملي امنیت رییس جنرال مومن حسین خیل د تېرې پنشنبې په ورځ د کندهار ولایت په مقام کې د ناټو د لوړو پوړو چارواکو سره تر یوې امنیتي غونډې وروسته په یوه وسله وال برید کې و وژل شو.
د دغه برید مسوولیت وسله والو طالبانو پر غاړه واخیست او ویې ویل، چې جنرال عبدالرازق د هغه نفوذي کس له خوا و وژل شو، چې د کندهار د والي د ساتونکي په توګه دوه میاشتې وړاندې ګمارلی شوی وو.
د جنرال رازق وژل کېدو په کور دننه او بهر ګڼ غبرګونونه درلود، چې د خواله رسنیو له مخې ځینې په دغه کار کې بهرنیا، ځینې د پاکستان استخباراتي اداره او ځینې هم داخلي لاس او دسیسه بولي.
جمهورخبري آژانس:کابل
