۰
د ولسي جرګې ډېری غړي:

پارلماني ټاکنې رڼې وې او هغه یې درغلې بولي، چې ځانونه ورته ناکام ښکاري

چهارشنبه ۲ عقرب ۱۳۹۷ ساعت ۱۵:۱۱
د ولسي جرګې ډېری غړي د تېرې شنبې او یک شنبې په ورځو د ولسي جرګې تر سره شوې ټاکنې ډېرې رڼې بولي او وایي هغه کسان په دې ټاکنو نیوکه کوي او درغلې یې ګني، چې ځانونه ورته ناکام ښکاري.
پارلماني ټاکنې رڼې وې او هغه یې درغلې بولي، چې ځانونه ورته ناکام  ښکاري
د ولسي جرګې ډېری غړي د تېرې شنبې او یک شنبې په ورځو د ولسي جرګې تر سره شوې ټاکنې ډېرې رڼې بولي او وایي هغه کسان په دې ټاکنو نیوکه کوي او درغلې یې ګني، چې ځانونه ورته ناکام ښکاري.

خو د ولسي جرګې یو شمېر نور غړو بیا په تېرو ټاکنو سختې نیوکې وکړې او ویې ویل، چې په ټاکنو کې په پراخه کچه درغلي شوي.

د جرګې د نن چهارشنبې د لړم دوهمه په امتیازي ساعت کې د هرات استازي غلام فاروق مجروح د ولسي جرګې ټاکنې خورا رڼې وبللې او ویې ویل، چې د افغانستان په تاریخ کې په دې ټاکنو کې درغلي کمه وه.

د هغه په وینا هغه کسان د ټاکنو پر پروسه نیوکه کوي او له درغلۍ یې ډګه بولي، چې د ده په وینا پر دې باوري، چې ټاکنې یې بایللې او پارلمان ته لار نه شي موندلی.

نوموړي د ټاکنو پر خپلواک کمېسیون غږ وکړ، هغه کسان پرېنږدي، چې غواړي، د ولس له باور سره خیانت وکړي او ستونزې جوړې کړي.

په جرګه کې د پکتیکا د خلکو استازي نادرخان کټوازي هم و ویل، چې ټاکنې تر ډېره رڼې وې، خو په ځینو مرکزونو کې درغلي شوې ده، چې کمېسیون یې باید جدي پلټنه وکړي او پاکې او ناپاکې رایې سره بېلې کړي.

د کټوازي په وینا په ځینو ځایونو کې چې درغلۍ شوې او یا هم لار ورته هواره شوې هغه هم د دې له امله چې هلته بایومتریک سیستم فعال نه و.

وکیلانو همدا راز ویلي که د ټاکنو خپلواک کمیسیون د ټاکنو پایلې اعلانوي نو ټول اړخونه دې دغه پایلې ومني او په هېواد کې دې بې ځایه مخالفتونو او لاریونو ته زمینه نه برابروي.

خو د ولسي جرګې ځینو وکیلانو بیا دغه ټاکنې له ستونزو او درغلیو ډکې بللې او ټینګار یې کاوه، چې په ډېری مرکزونو کې درغلي شوې ده.

د جرګې غړي محمد هاشم مهمدي و ویل، په خواشنۍ سره د کابل په لوېدیځ کې په ښکاره ډول د رایو پېر او پلور روان و، او ان درې ورځې ټاکنې تر سره شوې.

هغه و ویل، چې د ټاکنو په درېیمه ورځ یې خپله یوه ډینا موټر چې د رایو صندقونه په کې بار و وڅاره چې په څرخي پله کې پوځي روزنیز مرکز ته د ننه شو او کله مې چې پوښته وکړه راته و ویل، چې د پوځ ۱۰۰ افسران د رایې له ورکولو پاتې دي، هغوی باید رایه ورکړي.

په جرګه کې د نورستان استازي هم ټاکنې له درغلیو ډکې وبللې او ویې ویل، چې په دغه ولایت کې ډېری صندقونه د والي، امنیه قوماندان او ځینو نورو مسولینو له خوا د ځانګړو نوماندانو په پلوي ډګ شوي دي.

ولسي جرګه کې د لوګر استازي شکیلا هاشمي هم و ویل، چې په لوګر کې د ټاکنو په پروسه کې بې درېغه درغلي شوې او د دې په وینا دا ځل به ولسي جرګې ته هغه زورواکي له لوګر څخه راشي، چې په درغلۍ یې صندقونه ډک کړي دي.

جمهورخبري آژانس:کابل
 
 
ستاسو نوم

ستاسو دبرېښنا ليک پته
ستاسو نظر *

تر ټولو ډېر لیدل شوي