امریکا وایي دوی او نور ملګري یې په افغانستان کې د پر وخت او رڼو ولسمشریزه ټاکنو تر سره کېدو ملاتړ کوي.
د جمهور آژانس د خبر له مخې دغه څرګندونې کابل کې د امریکا متحده ایالاتونو سفیر جان باس کړې او ویلي یې دي امریکا او د ټاکنو نور مالي ملاتړي په افغانستان کې د رڼو او عادلانه ولسمشریزه ټاکنو ملاتړي دي.
نوموړي ټینګار کړی، امریکا غواړي د افغانستان ټاکنې، شفافې، عادلانه، پر خپل وخت او له درغلیو پاکې وي.
کابل کې د امریکا سفیر دا هم ویلي، چې د ژنیو په کنفرانس کې به هم د افغانستان د ټاکنو په اړه له نړیوالو سره خبرې وکړي. دغه راز باس زیاته کړې، چې په دې کنفرانس کې به د نړۍ له مهمو څېرو سره د افغانستان د سولې، امنیت، بیارغونې او د ترهګرۍ ضد مبارزې په اړه خبرې کوي.
سفیر جان باس زیاته کړې، چې امریکا غواړي د افغانستان د اوږدې جګړې لپاره معقول حل پیدا کړي او دغه هېواد ته دایمي ثبات راوګرځي.
جمهورخبري آژانس:کابل
