ولسمشر محمد اشرف غني وايي، د سولې په تړاو په جوړېدونکي مشورتي بورډ کې د ښځو د استازو حضور او لیدلوری مهم دی.
د جمهور آژانس د خبر له مخې ولسمشر دغه څرګندونې پرون دوشنبې د لړم ۲۲ مه ماښام ارګ د افغان ښځو شبکې غړو سره په کتنه کې کړې دي.
له ارګه خپره شوې خبرپاڼه وایي، په دغه کتنه کې د افغان ښځو شبکې مشرې روشن مشعل او د یادې شبکې د مدیره پلاوي غړې مریم رحماني د سولې په اړه خپل وړاندیزونه او لیدلوري شریک کړل.
دوی په خپلو خبرو کې ویلي، چې افغان ښځې د پایداره سولې غوښتونکې دي او د سولې فرهنګ په ترویج کې فعال رول لري او له ولسمشره یې وغوښتل، چې ښځې دې په ټولو مذاکراتوکې فعال حضور ولري، متخصص افراد دې د سولې مذاکراتو پروسه کې شامل شي او لاسته راوړنې باید د مذاکراتو قرباني نه شي.
وروسته ولسمشر د ولسي جرګې ټاکنو کې د ښځو پراخ حضور څخه په مننې کولو ویلي، چې د سولې د مذاکراتو په موخه مشورتي بورډ جوړېږي او په هغه کې د ښځو د استازو حضور او لیدلوری مهم دی.
ولسمشر د افغان ښځو شبکې غړو څخه وغوښتل چې د سولې په اړه خپلې مشخصې طرحې او وړاندیزونه په درې ورځو کې شریک کړي.
جمهورخبري آژانس:کابل
