ننګرهار کې د یوه خصوصي تلوېزیون مشر تښتول شوی دی

14 قوس 1397 ساعت 8:05

سیمه ییز چارواکي وايي، نامعلومه وسله والو کسانو ننګرهار ولایت کې د یوه خصوصي رادیو او تلوېزیون بنسټ ګر او مشر تښتولی دی.


سیمه ییز چارواکي وايي، نامعلومه وسله والو کسانو ننګرهار ولایت کې د یوه خصوصي رادیو او تلوېزیون بنسټ ګر او مشر تښتولی دی.

د جمهور آژانس د خبر له مخې دغه پېښه پرون سه شنبې د لیندۍ ۱۳ مه ماښام د جلال آباد ښار د څلورمې ناحیې په اړونده سیمه کې رامنځ ته شوې ده.

د ننګرهار د والي ویاند عطاالله خوږیاڼی زیاتوي، چې نامعلومه وسله والو کسانو د انعکاس رادیو او تلوېزیون بنسټګر او مشر انجینر زلمی تښتولی دی.

د هغه په وینا انجینر زلمی په خپل زرې موټر کې سپور و او وسله وال بیا په یوه کرولا موټر کې و، چې د څلورمې ناحیې په سیمه کې یې نوموړی له ځان سره وړی او موټر چلوونکی یې په ډوزو ویشتی دی.

په ورته وخت کې د ننګرهار د عامې روغتیا ریاست چارواکي وايي، دوی ته د انجینر زلمي موټر چلوونکی په ټپي حالت وروړل شوی چې وروسته یې په روغتون کې ساه ورکړې ده.

انجینر زلمی تر دې وړاندې د ننګرهار د ملي تلوېزیون امر و، خو په دې وروستیو کې یې د انعکاس رادیو او تلوېزیون جوړ کړي و.

تر اوسه د هغه د تښتونې لامل نه دی معلوم او نه یې هم مسؤولیت چا پر غاړه اخیستی خو د ننګرهار چارواکي وايي، امنیتي ځواکونو پلټنې پیل کړې دي.

جمهورخبري آژانس:ننګرهار
 
 


د مطلب کود: 110986

دمطلب پته: https://www.jomhornews.com/ps/news/110986/

جمهور
  https://www.jomhornews.com