د کوټې شورا غړي او د پاکستان مهم استخباراتي چارواکي هم ورغلي

سرچینې وايي، په اماراتو کې د طالبانو او امریکايي استازو تر منځ غونډې ته د طالبانو د کوټې شورا څلور غړي او دغه راز د پاکستان لوړ پوړي استخباراتي چارواکي او د بهرنیو چارو وزارت دیپلوماتان هم ورغلي دي.

د جمهور خبري آژانس د خبر له مخې په متحده عربي اماراتو کې د امریکايي او طالب استازو تر منځ پر افغان سولې پرون دوشنبې د لیندۍ ۲۷ مه خبرې پيل شوې دي.

د متحده عربي اماراتو ډي نشنل ورځپاڼې ویلي دغه ناسته درې ورځنۍ ده، چې پرون پیل شوې نن او سبا به هم دواړم ولري دي.

دغه ورځپانې زیاته کړې، چې یادې ناستې ته د طالبانو د پخواني مړه شوي مشر ملا محمد عمر د زوی ملا یعقوب دوه استازي هم ورغلي دي.

یادې ورځپاڼې ویلي د ملا یعقوب استازي یو د هغه اوښی ملا صدیق الله او بل ملا امیر خان متقي دي.

په ورته وخت کې ځینو طالب سرچینو ویلي، چې د اماراتو غونډې ته د کوټې شورا څلور تنه مهم غړي اوبوظبهې ته لېږل شوي دي.

ویل کېږي د طالبانو د مرکچي پلاوي مشر شېرمحمد عباس ستانکزی، د طالبانو د رهبري شورا غړی او د دفتر ريیس امیرخان متقي، د رهبري شورا غړی او د سیاسي دفتر مشر محمد زاهد احمدزی، د روغتیا د کمیسیون مرستیال ډاکتر فقیر، د پاکستان لپاره استازی (رابط) ملا عباس، د نظامي کمیسیون غړی مولوي محب الله حماس، د حقاني شبکې غړی قاري یحیي دي.

په امریکايي پلاوي کې، چې مشري یې د زلمي خلیلزاد په غاړه ده، د امریکا د دفاع وزارت یو مرستیال ډګروال جاکسن (Colin Jackson)، او مایکل فینزیل (BG Michael Fenzel) شامل دي.

په ورته وخت کې راپورنه وايي، دا چې د قطر حکومت په دې غونډه غوښ نه و، نو ځکه یې د طالبانو دوه مهمو مشرانو ملا فضل او ملا خیرالله خیرخوا ته اجازه نه ده ورکړې، چې د ابوظهبۍ په پرونۍ غونډه کې ګډون وکړي.

خو ویل کېږي، ښايي د طالبانو د مشر ملا هبة الله په هڅو ملا فضل او ملا خیرالله خیرخواه له قطره متحده عربي اماراتو ته د تګ اجازه ترلاسه کړای شي.

بل خوا سرچینې وايي، د اماراتو غونډې ته د ګډون په موخه د پاکستان مهم استخباراتي چارواکي او د بهرنیو چارو وزارت دیپلوماتان هم ورغلي دي.

همدارنګه افغان ولسمشرۍ ماڼۍ وايي، د ولسمشر د دفتر د رییس سلام رحیمي په مشرۍ د افغان حکومت مرکچي پلاوی هم له طالبانو سره د مخامخ لیدو په متحده عربي اماراتو کې دی.

ارګ اماراتو د دې مرکچي پلاوي د رسېدو خبر نن سه شبنې د لیندۍ ۲۷ مه په خپله رسمي ټوېټر پاڼه خپور کړی دي.

سرچینې لیکلي، چې چې مرکچي پلاوی دغه پلاوي پرون د اماراتو په پلازمېنه ابوظبۍ کې د افغان سولې لپاره د امريکا له ځانګړي استازي ډاکتر زلمي خليلزاد سره ليدلي دي.

د ارګ په ټوېټر پاڼه لیکل شوي، چې یاد پلاوی په نږدې راتلونکي کې له طالب پلاوي سره د مخامخ خبرو لپاره په تياريو بوخت دى او دغه راز د متحده عربي اماراتو او سعودي عربستان له استازو سره هم وګوري.

د افغانستان د ملي امنيت شورا سلاکار ډاکتر حمدالله محب په ټويټرپاڼه کې راغلي چې د سلام رحيمي په مشرۍ افغان مرکچي پلاوى په اماراتو کې پاتې دى او نن نورې ليدنې لري.

ښاغلي محب د سعودي، امريکا او متحده عربي اماراتو د ملي امنیت له سلاکارانو سره تر ګډې غونډې وروسته کابل ته رسېدلى دى او هيله څرګنده کړې چې په افغانستان کې سوله راتلونکې ده.

جمهورخبري آژانس:کابل