ډېورنډ کرښې ته نېږدې د افغان ځواکونو او طالبانو تر منځ جګړه شوې

سیمه ییز امنیتي چارواکي وايي، د کندهار ولایت سپین بولدک ولسوالۍ کې ډېورنډ کرښې ته نېږدې د افغان ځواکونو او طالبانو تر منځ نښته شوې ده.

د جمهور خبري آژانس د خبر له مخې راپورونه زیاتوي، طالبانو د یادې ولسوالۍ د رباط پر امنیتي پوستو برید وکړ، چې د نن شنبې مرغومي ۲۲ مې تر سهار درې بجو پورې یې دوام درلود.

یوه امنیتي چارواکي د نوم نه ښودلو په شرط امریکا غږ ته ویلي، چې د طالبانو په برید کې پنځه پولیس وژل شوي او دوه نور ټپیان شوي دي.

سرچینه زیاتوي، چې په ځوابیه برید کې ۷ وسله وال طالبان هم وژل شوي او شپږ نور یې ټپیان دي.

د کندهار د والي ویاند عزیز احمد عزیز هم په یاده سیمه کې د جګړې پخلی کړی خو وايي، د اوښتې مرګ ژوبلې په اړه به وروسته معلومات خپاره کړي.

دا په تېرو څو ورځو کې دوهم ځل دی، چې د کندهار په سپین بولدک ولسوالۍ کې ډېورنډ کرښې ته څېرمه د افغان ځواکونو او طالبانو تر منځ جګړه کېږي.

جمهورخبري آژانس:کندهار