سیمه ییز چارواکي وايي، کندهار ولایت کې د استناف محکمې یو څارنوال په یوه غلچکي وسله وال برید کې وژل شوی دی.
د
جمهور خبري آژانس د خبر له مخې دغه پېښه نن یکشنبې د سلواغې ۷ مه د کندهار ښار د دویمې امنیتي حوزې په اړونده سیمه کې رامنځ ته شوې ده.
د کندهار د والي ویاند عزیز احمد عزیزي وايي، غلچکي برید کوونکو سپوږمۍ سالون ته څېرمه د کندهار د استناف محکمې په یوه څارنوال وسله وال برید کړی دی.
نوموړي زیاته کړه، څرنوال عبدالواحد په دغه برید کې لومړی ټپي او وروسته یې په روغتون کې د درملنې پر مهال ساه ورکړې ده.
د کندهار د والي د ویاند په خبره څارنوال عبدالواحد د بغلان ولایت اوسېدونکی او د کندهار په استیناف محکمه کې یې دنده درلوده.
د هغه په وینا برید کوونکي له سیمې په تېښته بریالي شوي، خو پولیسو یې د نیولو پلټنې پیل کړې دي.
تر اوسه د دغه برید مسوولیت چا پر غاړه نه دی اخیستی.
دا په داسې حال کې ده، چې تېره ورځ هم د کندهار ښار په درېیمه حوزه کې د میوند ولسوالۍ د امنیت پر مدیر ورته برید شوی و، خو هغه روغ ترې وتلی وو.
جمهورخبري آژانس:کابل