په ملي دفاع وزارت کې یو لړ بدلونونه راغلي، چې له مخې یې یاسین ضیا د وزارت د لومړي مرستیال او ډګر جنرال بسم الله وزیري د پوځ د لوی درستیز په توګه ټاکل شوي دي.
د جمهور آژانس د خبر له مخې دفاع وزارت په یوه خبرپاڼه کې، چې پرون سه شنبې د شپې ناوخته یې خپره کړې ویل شوي، چې یاسین ضیا د ملي دفاع وزارت د مرستیال او جنرال بسم الله وزیري د وسله والو ځواکونو د لوی درستیزي په توګه ټاکل شوي دي.
دغه راز په خبرباڼه کې ویل شوي، ډګر جنرال محمد شعیب په هوايي برخه کې د لوی درستیز مرستیال او تورن جنرال عبدالفهیم رامین د هوايي قل اردو د قوماندان په توګه ټاکل شوي دي.
خبرپاڼه دا هم وايي، چې د ځانګړو عملیاتو د قل اردو د قوماندانۍ مرستیال محمد حیدر نېکپی به د نوي قوماندان تر ټاکل کېدو پورې د دې قول اردو سرپرست قوماندان وي.
دفاع وزارت د څو نورو نویو ګمارنو خبر هم ورکړل شوی او ویل شوي دي چې دا کسان د دفاع وزارت د بېلابېلو وړاندیزونو او د ولسمشر محمد اشرف غني د حکم پر بنسټ ټاکل شوي دي.
د یادونې وړ ده، چې ډګر جنرال بسم الله وزیري تر دې وړاندې د ځانګړو عملیاتو د قول اردو قوماندان و او جنرال عبدالفهیم رامین چې مخکې د ۷۷۷ ځانګړې لوا قوماندان.
دا هم باید و ویل شي، چې تر جنرال بسم الله وزیري د وسله والو ځواکونو لوی درستیز جنرال شریف یفتلي وو.
جمهورخبري آژانس:کابل
