ملي دفاع وزارت شمال کې د پوځ د ۲۰ مې فرقې د ارتقا او دغه فرقه په ۲۱۷ قول اردو د بدلېدو خبر ورکړ.
د جمهور آژنس د خبر له مخې د وزارت څخه نن پنشنبې د وري ۲۲ مه خپره شوې خبرپاڼه کې راغلي، چې یاد قول اردو دوه ورځې وړاندې د ملي دفاع وزارت د مرستیال ډګر جنرال هلال الدین هلال له خوا پرانستل شوه.
په خبرپاڼه کې ویل شوي، چې د ځانګړو عملیاتو د قول اردو پخوانی رییس ارکان تورن جنرال نبي الله میرزايي د ۲۱۷ قول اردو د قوماندان په توګه معرفي شوی دی.
د ملي دفاع وزارت مرستیال جنرال هلال د دغه قول اردو د پرانستې په مراسمو کې ویلي، دا د هېواد شمال په امنیت کې د تامین لپاره یو مثبت ګام و، چې ورسره به د شمال ختیځو سیمو خلکو امنیت خوندي شي.
په ورته وخت کې د قول اردو قوماندان تورن جنرال نبي الله میرزايي ډاډ ورکړی، چې په خپل ټول توان سره به د هېواد په شمال ختیځ کې د دولت د اهدافو د تحقق او خلکو د امنیت لپاره نه ستړې کېدونکې هڅې وکړي.
باید و ویل شي، چې په شمال کې د ۲۱۷ قول اردو په قندوز ولایت کې موقعیت لري.
دغه قول اردو پر داسې مهال جوړېږي، چې د هېواد په شمال ختیځ کې له تېرو څو کلونو راهیسې امنیت ترینګلی دی او د سیمې خلکو د امنیت د خوندیتوب لپاره د قول اردو جوړېدو غوښتنه کوله.
جمهورخبري آژانس:کابل
