سمنګان:د ولسي پاڅونوالو د یوه قوماندان د کورنۍ څلور غړي وژل شوي

سیمه ییز چارواکي وايي، سمنګانو ولایت کې د وسله والو طالبانو په یوه برید کې د سیمه ییزه پاڅونوالو د یوه قوماندان د کورنۍ ۱۴ تنو ته مرګ ژوبله اوښتې ده.

د جمهور خبري آژانس د خبر له مخې دغه پېښه تېره شپه (د غوايي ۲۱ مه) د سمنګان ولایت د دره صوف پاین ولسوالۍ کې رامنځ ته شوې ده.

د یادې ولسوالۍ ولسوال عبدالقین وایي، طالبانو د شپې له خوا د ولسي پاڅونوالو د یو قوماندان پر کور برید کړی او څلور غړي یې ور وژلي دي.

د هغه په وینا د طالبانو په دې برید کې د قوماندان د کورنۍ درې ښځې او یو ماشوم وژل شوی دی او ۱۰ تنه نور، چې ښځې او ماشومان هم په کې شامل دي، ټپیان شوي.

نوموړي د ټپیانو د روغتیايي حالت او دغه راز د قوماندان د نوم په اړه نور معلومات نه دي ورکړي.

طالبانو هم تر اوسه په دې اړه څه نه دي ویلي.

جمهورخبري آژانس: سمنګان