پوهنې وزارت اعلان کړی په پام کې لري، چې د ښوونکو معاشونه لوړ کړي او په همدې موخه یې د معاشونو د لوړولو طرحه ولسمشر ته لېږلې ده.
د جمهور آژانس د خبر له مخې د پوهنې وزارت وايي په دې وروستیو کې د هېواد په ګوټ ګوټ کې ښوونکو د معاشونو له کموالي شکایت کړی دی.
د وزارت په خبرپاڼه کې ویل شوي له همدې امله دوی د معاشونو د لوړلو طرحه ولسمشر ته استولې ده او د همدې روان کال په اوږدو کې به د ښوونکو په معاشونو کې زیاتوالی راشي.
خبرپاڼه وايي، د پر اساس د ۱۲ام پاس ښوونکي په معاش کې ۵۰۰ او د څوارلسم پاس ښوونکي په معاش کې ۱۰۰۰ افغانۍ ډېروالی راځي.
پوهنې وزارت زیاته کړې، چې د همدې طرحې له مخې به هر ښوونکي ته د ورځې اتیا افغانۍ د تګ راتګ کرایه هم ورکړل شي.
د دغه وزارت چارواکو ویلي، چې په هېواد کې د روان وضعیت او د ښوونکو د ډېروالي له امله دوی په کافي اندازه په معاش کې زیاتوالی نه شي راوستلی.
پوهنې وايي، د دغه طرحې تایید به د ښوونکو د فکري آرامتیا لامل شي او دغه راز به د زده کړو پر کیفیت هم مثبته اغېزه ولري.
دغه راز وزارت زیاتوي، چې دوی ژمن دي، چې د ښوونکو د ژوند وضعیت د ښوالي په موخه هغوی ته د دوی د اوسېدو ځای ته نېږدې په اوږد مهاله قسطونو رهایشي اپارتمانونه هم ورکړي.
جمهورخبري آژانس:کابل
