ولسمشر محمد اشرف غني اړونده ادارو ته امر کړی، چې د کابل سیند د مدیریت پروژې دویم پړاو پیل کړي او په دې برخه کې لا ډېره همغږي رامنځ ته کړي.
د جمهور آژانس د خبر له مخې ارګ وايي، د ولسمشر غني په مشرۍ د کابل سیند د مدیریت پروژې د کار د تعقیب غونډه نن سهار په ارګ کې جوړه شوه.
د ارګ خبرپانه زیاتوي، چې دغه غونده کې اوبو او انرژۍ، ترانسپورت، د ښار جوړولو او ځمکو وزارتونو، دکابل ښاروالۍ او د کابل ولایت مسوولینو د کابل سیند د مدیریت پروژې په اړه د خپلو کړنو راپورنه ولسمشر ته وړاندې کړل.
دوی ویلي، چې د کابل د سیند هایدرولوژي او توپوګرافي کار او د دغه سیند په مسیر کې د ۱۶ پلونو ډیزاین بشپړ شوی او دغه راز وروسیتو سېلاب ځپلو سره چې کورونه یې ویجاړ شوي همکاري دوام لري.
ولسمشر ټینګار کړی، چې د اړوندو ادارو ترمنځ د کابل سیند د مدیریت پروژې د تطبیق په برخه کې لا زیاتې همغږۍ ته اړتیا ده او له هغوی څخه یې د منظمو او اونیزو راپورونو غوښتنه وکړه.
ښاغلي غني د کابل سیند د مدیریت په خاطر د هغه د حریم تعین، تثبیت، تصفیه او د هغه د ساحې ډیزاین ارزښتناک وباله او وې ویل، د کابل سیند د پروژې مدیریت راتلونکو پړاوونو کې د پلانونو وضاحت ته اړتیا لرو.
نوموړي یادو مسوولینو ته یې لارښوونه وکړه چې د کابل سیند د احیا او بیا رغاونې پلان له بشپړیدو وروسته د مطبوعاتي کنفرانس له لارې په هغه اړه له خلکو سره معلومات شریک کړي.
ولسمشر د کابل سیند پروژې مدیریت کې د دخیلو بنسټونو مسوولینو څخه وغوښتل چې د کابل سیند په سرچینو کې دې د بندونو جوړول په پام کې ونیسي او زیاته کړې یې ده، چې هر ارګان لپاره دې بودجه واضح شي او د پروژې دویم پړاو دې عاجل پیل شي.
هغه د دغې پروژې د ښې همغږۍ او مدیریت په خاطر د کابل والي ته لارښوونه وکړه چې د کابل سیند د مدیریت پروژې عمومي مدیریت پر غاړه واخلي.
جمهورخبري آژانس:کابل
