چین د افغان سولې په برخه کې د مهمو پرمختګونو خبر ورکړی او دا هم وايي، چې په دې پروسه کې هند ګوښی نه دی ساتل شوی.
د
جمهور خبري آژانس د خبر له مخې د چین د بهرنیو چارو وزارت ویاند جینګ شوانګ وايي، هېواد یې د افغان سولې په برخه کې هر ډول همکاری ته چمتو دی.
نوموړي په افغان سوله کې د شویو پرمختګونو جزیات نه دي په ډاګه کړې، خو په افغان سوله کې یې د هند همکاري هم اړینه بللې.
هغه دا خبره هم رد کړې، چې ګڼې هند د افغان سولې په روانو هڅو کې ګوښه ساتل شوی دی.
شوانګ وايي، هند د افغان سولې پروسه کې ګوښی نه دی ساتل شوی بلکې د دغه هېواد همکاري په دې برخه کې ډېره اړینه ده.
نوموړي ټینګار کړی، چې د افغانستان جګړه د خبرو له لارې د حل وړ ده او د سیمې د هېوادونو ملاتړ او همکاري په دې برخه کې اغېزناکه او ګټوره ده.
چین په داسې حال کې له افغان سولې د هند د لرې ساتلو راپورونه ردوي، چې هندۍ ټایمز اف انډیا ورځپاڼه وایي، هند د افغان سولې پروسې څخه ایستل شوی دی.
ورځپاڼې په چین کې د افغان سولې په اړه د پاکستان، روسیې او چین غونډې ته په اشارې لیکلي، په چین کې له شوې غونډې چې د افغان سولې په تړاو پکې ځینې مهمې پرېکړې هم وشوې.
مطلب کې وړاندې راغلي، په افغان سوله کې د هند غږ نه اورېدل کېږي او لامل یې هم دا دی چې په دې مهمه پروسه کې پاکستان مرکزيت ته ځان رسولی او د خپلو ګټو په لټه کې دی.
جمهورخبري آژانس:کابل