دا چې د مشرانو جرګې ګڼ شمېر سناتوران د ولسمشریزه ټاکنو په کمپاینونو بوخت دي نو د جرګې غوندې سر له نن ورځې وځنډول شوې.
د جمهور آژانس د خبر له مخې د نورو ورځو په څېر ټاکل شوې وه نن یکشنبې د وږي ۳۱ مه هم مشرانو جرګه غونډه ولري، خو دروازه یې تړلې وه.
ځینې سناتوران وایي، د جرګې عمومي غونډې له دې امله، چې یو شمېر سناتوران په کمپاینونو کې بوخت دي او د جرګې نصاب نه پوره کېږي نو عمومي غونډې هم ځنډېدلې دي.
د مشرانو جرګې غړی محی الدین منصف هم همدا خبره کوي وایي، ځینې سناتوران په کمپاینونو کې بوخت دي او د جرګې نصاب پوره نه وو، خو سناتوران په کمېسیونونو کې کار کوي.
خو سناتوره نبیه مصطفی زاده وایي، ډېر سناتوران د خپلې خوشې ولسمشرۍ نوماند ته کمپاینونو کې مصروف دي او له همدې امله د جرګې غونډو ته نه راځي.
نوموړې و ویل، چې د سناتورانو دغه کړه خپل کار، قانون او د افغان ولس ستونزو ته لومړیتوب نه ورکول دي، چې نباید دا ډول کړنې تر سره کړي.
د هغې په وینا دا چې په هېواد کې شرایط حساس او د ولس ستونزې ډېرې دي، نو سناتوران باید د کمپاینونو پر ځای د جرګې عمومي غوندې ته ورشي او د خلکو ستونزې هوارې کړي.
دا یوازې د مشرانو جرګې ستونزه نه ده، بلکې تر دې وړاندې ولسي جرګه هم له دغه ډول ستونزې سره مخ او د وکیلانو د نه ورتګ له امله یې نصاب نه پوره کېده.
د ولسي جرګې هم ډېری غړي له تېرو څو ورځو راهیسې په عمومي او د کمېسیونونو په غوندو کې برخه نه اخلي، خو منتقدین یې وايي، چې د ځینو وکیلانو دغه کار له ولس سره ښکاره خیانت دی.
جمهورخبري آژانس:عبدالله امیني