په افغانستان کې د ناټو ملکي استازي نیکولاس کې وايي، د ټاکنو خپلواک کمیسیون کې د رایو شمېرل ساده کار نه دی بلکې وخت او حوصله غواړي.
د جمهور آژانس د خبر له مخط په افغانستان کې د ناټو ملکي استازي نیکولاس کې پرون د ټاکنو خپلواک کمیسیون ته ورغلی او هلته یې د رایو د شمېرنې له پروسې کتنه کړې ده.
نوموړي ویلي د ټاکنو خپلواک کمیسیون د شفافو ټاکنو ډاډ ورکوي، د رایو شمېرنې پروسه هم ډاډمنه بولي او وایي، تر دې دمه کارونه په سمه توګه مخ ته ځي.
هغه پر نوماندانو او د ټاکنو په برخه کې پر فعالو بنسټونو غږ کړی چې له زغم کار واخلي او د ټاکنو خپلواک کمیسیون ته اجازه ورکړي چې شفافیت تضمین کړي.
په ورته وخت کې د ټاکنو خپلواک کمیسیون هم وایي چې دوی شفافیت ته ژمن دي او هېڅ وخت به د تېرو ټاکنو ترخې تجربې تکرار نه کړي.
دغه کمېسیون هم په یوه خبرپاڼه کې ویلي، چې کابل کې د ناټو او انګلستان سفیران پرون کمېسیون ته ورغلي و او د کمېسیون د رهبرۍ غړو سره یې د ولسمشریزه ټاکنو پر څرنګوالي خبرې اترې وکړې.
جمهورخبري آژانس:کابل
