ملي دفاع وزارت وایي، افغان ځانګړو ځواکونو د کندوز ولایت دشت ارچي ولسوالۍ بېرته له طالبانو نیولې ده.
د جمهور آژانس د خبر له مخې دفاع وزارت نن شنبې د تلې ۲۰ مه خپره کړې خبرپاڼه کې ویلي، ځانګړي ځواکونه وتوانېدل، چې له څلور میاشتني ځنډ وروسته دشت ارچي ولسوالۍ ولکه کړي.
سرچینه زیاتوي، افغان ځانګړي ځواکونه تېره شپه یوه نیمه بجه دشت ارچي ته داخل شوي دي او تر سهاره یې دا ولسوالي په بشپړ ډول له طالبانو پاکه کړې ده.
ملي دفاع وزارت وايي، دا مهال یې په دشت ارچي ولسوالۍ کې د طالبانو څو پټنځایونه له منځه وړي دي او درانه تلفات یې هم ور اړولي خو د کره شمېر په اړه یې څه نه وایي.
د دفاع وزارت د معلوماتو له مخې په تېرو ۶ میاشتو کې ۱۲ ولسوالۍ په غزني، بدخشان، کندوز، تخار او فاریاب کې بېرته له طالبانو نیول شوې دي.
جمهورخبري آژانس:کابل
