افغان ولسمشر محمد اشرف غني د چین د بهرنیو چارو وزیر وانګ یي سره په تلېفوني خبرو کې پر افغان سولې او ټاکنو خبرې کړې دي.
د جمهور آزانس د خبر له مخې چینايي وزیر په خپلو خبرو کې ویلي، چې هېواد یې د افغانانو په مشرۍ د سولې او مذاکراتو ملاتړ کوي او افغان محوره سوله غواړي.
د چین د بهرنیو چارو وزیر وانګ يي ټینګار کړی، چې د افغان سولې پروسه باید د افغان حکومت او افغانانو په محوریت او مالکیت مخ ته لاړه شي.
نوموړي ویلي، چې دوی د افغانستان د سولې په پروسه کې هر ډول همکارۍ ته تیار دي او دغه راز یې د ولسمشریزو ټاکنو د ترسره کېدو له امله ولسمشر ته مبارکي هم ورکړې ده.
وانګ یې زیاته کړې، چین به همدا راز له افغانستان سره دولت په دولت اړیکې پالي او د دې اړیکو پراختیا ته به ادامه ورکوي.
د یادونې ده، چې ولسمشر غني او وانګ یی د دې تر څنګ په چین کې د افغان سولې په اړه د جوړېدونکې غونډې په اړه هم خبرې کړې دي.
جمهورخبري آژانس:کابل
