لسګونو ساختماني او قراردادي شرکتونو ادعا وکړه، چې زرګونه پروژې یې پلي کړې، خو د مالیې وزارت یې د پیسو له ورکړې ډډه کوي.
د جمهور آژانس د خبر له مخې د دغه شرکتونو استازو نن یکشنبې د لړم ۱۹ مه کابل کې د یوې اعتراضیه خبري ناستې پر مهال و ویل، چې دوی د هېواد په ۳۴ ولایتونو کې زرګونه پروژې پلې کړې او پر مالیې وزارت یې میلیاردونه افغانۍ اړولې دي.
د هلال حمزه شرکت مسوول احمد ضمیر په دې اړه خبریالانو ته و ویل، چې د مالیې وزارت له تېرو ۷ میاشتو راهیسې د دوی د پلې کړیو پرژو د پیسو له ورکړې ډډه کوي.
د هغه په وینا مالیې وزارت د دوی د غوښتنو په ځواب کې ویلي، چې د دغه پروژو بودجه د ولسمشرۍ په ټاکنو کې لګول شوې او دوی بودجه نه لري.
د دې شرکتونو او قرادادیانو استازي وایي، مالیې وزارت زیاتره د هغه پروژو د پیسو له ورکړې ډډه کوي، چې د معارف، ښار جوړونکي او د کلیو پراختیا وزارت اړوند دي.
د دغه معترضانو له ډلې یو بل تن سعادت خان ادعا وکړه، چې مالیې وزارت د زرګونو پلې کړیو پروژو پیسې، چې د ۱۰ میلیارد زیات افغانۍ کېږي له تېرو ۷ میاشتو راهیسې نه ورکړي.
همدارنګه د آرشي ساختماني شرکت مسوول محمد شاهین هم و ویل، چې د دوی شرکت په بغلان، قندوز، او بدخشان ولایتونو کې ګڼې پروژې چې د پلي کېدو په حال کې دي، خو د مالیې وزارت یې پیسې نه دي وکړې.
د هغه په وینا یوازې د معارف وزارت د پلې کړیو پروژو له مخې د ساختماني شرکتونو ۴۰۰ میلیونه افغانۍ پوروړی دی.
د دې ساختماني شرکتونو استازو خبرداری ورکړ، چې که مالیې وزارت د دوی پیسې ورنه کړي، نو د هېواد په ۳۴ ولایتونو کې زرګونه پلې کېدونکې پروژې به ودروي.
مالیې وزارت تر اوسه په دې اړه غبرګون نه دی ښودلی.
جمهورخبري آژانس:عبدالجلیل سروش
