د ننګرهار سیمه ییز چارواکو تایید کړه، چې جاپاني الااصله افغان ډاکتر ناکامورا د خپلو ژورو ټپونو له امله په روغتون کې ساه ورکړې ده.
د جمهور آژانس د خبر له مخې د ډاکتر ناکامورا پر موټر نن چهارشنبې د لیندۍ ۱۳ مه د مرکز جلال آباد ښار د درېیمې ناحیې اړوند سیمه کې ناپېژانده وسله والو برید وکړ.
د ننګرهار د والي ویاند عطاالله خوږیاڼي په لومړي سر کې و ویل، چې په دغه برید کې ډاکتر ناکامورا ټپي شوي، خو درې ساتونکي، یو موټر چلوونکی او یو بل کس وژل شوی دي.
ډاکتر ناکامورا د لومړۍ درملنې لپاره د ننګرهار روغتون ته وړل شوی و خو د ننګرهار والي و ویل، چې وروسته د بهرنیو ځواکونو په الوتکه کې د بګرام روغتون ته یووړل شو.
د ننګرهار والي شاه محمود میاخیل زیاته کړې، چې ډاکتر ناکامورا د ټپونو تاب را نه وړلی شو او په بګرام روغتون کې یې ساه ورکړې ده.
والي د نوموړي په وژل کېدو ژوره خواشني وښوده او ویې ویل، ډاکتر ناکامورا له کالونو راهيسې په دې ولايت کې د کانالونو، چيک ډيمونو او کرنې په برخه کې په خدمت بوخت و، چې د سيمې زرګونه کسانو ته يې کاري فرصتونه برابر کړي او ګڼ شمېر پروژې يې پلې کړې.
ده زیاته کړه، چې په هېواد کې د بې ګناه افغانانو پر ضد د نا اعلان شوې جګړې په ترڅ کې دښمنان په هغه کسانو باندې تروريستي بريدونه کوي، چې ابادۍ او سوکالۍ لپاره کار کوي.
د دغه برید مسوولیت تر اوسه چا پر غاړه نه دی اخیستی.
باید وویل شي، ډاکټر ناکامورا له اوږدې مودې راهیسې په افغانستان کې مېشت و او د کامې د کانال تر څنګ د ښېوې پارک او ګڼو پراختیايي پروژو پلي کوونکی دی.
نوموړي ته څه موده وړاندې افغان ولسمشر د افغانستان افتخاري تابعیت او الکترونیکي تذکیره هم ورکړه.
جمهورخبري آژانس:کابل