طالبانو هغه راپورونه رد کړي دي چې ګنې، د امریکا کانګرس د دغه هیواد دفاع وزارت ته اجازه ورکړې ده چې سږ کال طالبانو سره د خبرو لوژستیکي ملاتړ لپاره ۱۵ میلیونه ډالر ولګوي.
د جمهور آژانس د خبر له مخې پرون داسې راپورونه خپاره شول، چې ګنې د امریکا کانګرس په پام کې لري، د افغان سولې د مذاکراتو د لوجستیکي لګښتونو او طالب مشرانو د سفرونو لپاره ۱۵ میلیون ډالرو د لګولو منظوري ورکړي.
د سي کیو د راپور له مخې پنټاګون د دغو لوجیستیکي مصارفو لپاره د روان کال په می میاشت کې کانګرس ته وړاندیز استولی و چې ورته یې منظور کړي، تر څو د سولې پروسې په برخه کې د طالب مشرانو د سفرونو، اوسېدنې، خوراک، څښاک، اړیکو او نورو اړتیاو لپاره ترې استفاده وشي.
کانګرس غړو ټینګار کړی، چې له دغه پیسو څخه د طالبانو شخصي جېب ته ګټه ونه رسېږي، خو پنټاګون وايي امکان شته، چې له دې پیسو څه ناڅه طالبانو سره هم مرسته وشي.
خو قطر کې د طالبانو د سیاسي دفتر ویاند سهیل شاهین دغه راپورونه په کلکه رد کړي دي.
شاهین پر خپل ټویټر لیکلي«د ځینو رسنیو دا خبر چې د امریکې کانګرس د اسلامي امارت د مرکچیانو د لوژستیکي لګښتونو لپاره بودجه منظور کړې ده حقیقت نلري.»
د هغه په وینا که امریکا د خپل ټیم د مصارفو لپاره داسې کوم څه کړي وي، هغه د امریکا خپل کار دی په طالبانو پورې اړه نه لري.
جمهورخبري آژانس:کابل
